Եթե Լեռնային Ղարաբաղի հարցում Ադրբեջանը եւ Հայաստանը չգնան գոնե նվազագույն փոխզիջման, ապա պատերազմի վերսկսման վտանգը իրական է: Այս մասին վրացական «Պիրվելի» գործակալության հետ հարցազրույցի ժամանակ իր կարծիքն է հայտնել Եվրոպական ինտեգրման հետազոտությունների կենտրոնի ղեկավար Վասիլ Ճղոիձեն:
Փորձագետի կարծիքով, Ղարաբաղում զինված հակամարտության վերսկսման դեպքում, կվտանգվեն Վրաստանի ազգային շահերը, ինչպես նաեւ Կովկասի կայունությունը:
«Ստեղծված իրավիճակից կօգտվի Ռուսաստանը եւ որպես Հայաստանի ամենամոտ դաշնակից, Հայաստանի պաշտպանության պատրվակով սեփական զինված ուժերն ու ռազմական զինամթերքներն անցկացնելու համար կօգտագործի Վրաստանի տարածքը»,-նշել է նա, ընդգծելով, որ դա Վրաստանում կհանգեցնի ոչ կայունության եւ զինված բախման:
«Լեռնային Ղարաբաղում հակամարտության առաջացումը Հարավային Կովկասի ոչ մի երկրի շահերից չի բխում, ինչը շատ լավ հասկանում են Սարգսյանը եւ Ալիեւը»,-վերջում հայտարարել է Եվրոպական ինտեգրման հետազոտությունների կենտրոնի ղեկավարը:
