Հայաստանի բնակիչներին խորհուրդ է տրվում առաջիկա օրերին ձեռնպահ մնալ գազով գործող ջրատաքացուցիչ սարքերի օգտագործումից: Պատճառն անսովոր շոգն է եւ դրա հետեւանքով ծխնելույզներում ձգողության բացակայությունը:
«Հայպետհիդրոմետը խորհուրդ է տալիս գազսպառող բաժանորդներին այս շոգ օրերին, հատկապես ցերակային ժամերին, ձեռնպահ մնալ ջրատաքացուցիչ սարքերի օգտագործումից, իսկ օգտագործման դեպքում` անպայման պահպանել անվտանգության կանոնները»- NEWS.am-ին հայտնեցին Հայպետհիդրոմետի մամուլի ծառայությունից:
Հիշեցնենք, որ օդերեւութաբանների տվյալներով` Հայաստանում հուլիսի 30-ին, 31-ին եւ օգոստոսի 1-ին օդի ջերմաստիճանը կհասնի +40 աստիճանի: Մասնագետների կարծիքով` այս ջերմաստիճանն արդեն վտանգավոր է համարվում, այն կարող է կառավարության համար հանգստյան օրեր հայտարարելու ազդանշան լինել:
Օդերեւութաբանները խորհուրդ են տալիս կրել բաց գույնի հագուստ, շատ հեղուկ օգտագործել եւ խուսափել արեւի ուղիղ ճառագայթներից:
