Իտալական Պադույա նահանգի Չիտադելլայի քաղաքապետն արգելել է քեբաբի վաճառքը: Այս մասին հաղորդում է տեղի Il Mattino di Padova թերթը:
Քաղաքապետ Մասիմո Բիտոնչիի կարծիքով, քեբաբն, «անկասկած, մեր ավանդույթների մեջ չի մտնում եւ մեր ինքնության մի մասը չի կազմում»: «Այնտեղ, որտեղ քեբաբի իրացումը թույլատրված է, տեղի վարչակազմը եւ քաղաքացիները դառնորեն ափսոսում են դրա համար»,- ընդգծել է նա:
Բիտոնչիի հրահանգով, քաղաքի պատմական կենտրոնում չպետք է թույլ տրվի հասարակական սննդի կազմակերպում, որոնք մեծ քանակի թափոնների առիթ են դառնում: «Էլ չեմ խոսում սանիտարական նորմերը չպահպանելու մասին, քանի որ պատրաստվող սնունդը երկար ժամանակ գտնվում է դրսում: Մենք պետք է վերականգնենք մեր ազգային խոհանոցի լավագույն արժեքները»,- ընդգծել է քաղաքապետը: