Ռուսաստանի մայրաքաղաք Մոսկվայում եւս մի մեծ շուկայի փակման վերաբերյալ Մոսկվայի քաղաքապետարանի կողմից որոշում է ընդունվել, ըստ որի քանդվելու են Լյուբլինսկի շուկան եւ «Նեսսի» առեւտրի կենտրոնը, հաղորդում է ադրբեջանական «Պոլիգոն» լրատվականը` վկայակոչելով օգոստոսի 8-ին Մոսկվայի Արեւելք-Արեւմուտք վարչական շրջանի մամլո ծառայությունից ստացված պաշտոնական տեղեկությունները:
Աղբյուրը հայտնում է, որ վերոնշյալ շուկայի ամենախոշոր ֆինանսական բաժնետերերից մեկը ադրբեջանցի գործարար է, իսկ «Նեսսի» շուկայի կառավարման աշխատանքներն իրականացրել են Ադրբեջանի Շամխորի շրջանի գործարարները:
Նշվում է, որ այդ շուկայի մեծ մասի բաժնետերը Սփյուռքի հանձնաժողովի նախագահ Նազիմ Իբրահիմովն է: Նա 2007 թ. Ուկրաինայում ունեցած գործարարական կապերի միջոցով մասնաբաժին է ստացել «Նեսսի» շուկայում: Դրանից հետո նույն առեւտրի կենտրոնում սկսել է մեծ քանակությամբ օբյեկտներ աշխատեցնել:
«Պոլիգոնը» նաեւ հայտնում է, որ երեք օր է, ինչ Նազիմ Իբրահիմովը Մոսկվայում է եւ փորձում է կորստից փրկել իր կարողությունը, որը, սակայն, անհնար է իրականացնել:
Նշենք, որ վերջին ժամանակներում Իբրահիմովի գլխին «սեւ ամպեր» են կուտակվում հենց Ադրբեջանում, այսպես, վերջին անգամ Ադրբեջանցիների համաշխարհային կոնգրեսի երրորդ համագումարում հանձնաժողովի նախագահը արժանացել է նախագահ Իլհամ Ալիեւի կոշտ քննադատությանը իր կատարած ոչ արդյունավետ աշխատանքի համար: