Ադրբեջանում երեք տարվա ազատազրկման է դատապարտվել իրավապաշտպան Վիդադի Իսկենդերովը, հաղորդում է «Ազատություն» ռադիոկայանը:
Մասնավորապես, Իսկանդերովը մեղադրվում էր նախորդ տարվա խորհրդարանական ընտրությունների ժամանակ ընտրական գործընթացում անօրինաբար միջամտելու մեջ:
Իսկանդերովը ժխտել է իրեն ներկայացվող մեղադրանքները: Նա հայտնել է, որ իրեն հետապնդում են ընտրակեղծիքները բացահայտելու համար:
Շաբաթ օրը` օգոստոսի 27-ին, Գեյչայի շրջանային դատարանը Իսկանդերովին մեղավոր է ճանաչել ՔՕ-ի «ընտրողի քվեարկության խոչընդոտում», «ընտրական հանձնաժողովների աշխատանքների միջամտում» եւ «ծեծ» հոդվածներով:
Իրավապաշտպանը իր թեկնածությունն է առաջադրել Գեյչայի շրջանում: Ընտրություններից երկու օր անց նա ներկայացրել է խախտումների ապացույցներ, այդ թվում տեսանյութեր, որոնցում ֆիքսված էր քվեաթերթիկների լցոնման դրվագները:
Ընդդիմության ներկայացուցիչներն ու իրավապաշտպանները կարծում են, որ Իսկենդերովին հետապնդում են քաղաքական դրդապատճառներով:
