Հայաստանի ու Թուրքիայի մերձեցումը անհրաժեշտ է քննարկել որպես տարածաշրջանային գործընթաց, քանի որ այն կարող է խնդիրներ առաջ բերել Ջավախքում: Նման տեսակետ է հայտնել Վրաստանի ռազմավարական եւ միջազգային հետազոտությունների հիմնադրամի գիտաշխատող, պրոֆեսոր Վլադիմիր Պապավան: «Ես չեմ կարծում, որ այդ մերձեցումը տարածաշրջանի շահերից է բխում: Դրանից հետո Վրաստանը փաստարկ չի ունենա, ասելու, թե մցխեթցի թուրքերի վերադարձը նոր էթնիկ խնդիր կստեղծի տարածաշրջանում: Սակայն, իրականում, այդ տարածքում ապրող հայերը չեն ցանկանում ու վախենում են թուրքերի վերադարձից»,- ասել է նա:
Հիշեցնենք, որ այս տարվա հունվարին Վրաստանում ուժի մեջ է մտել բռնի տեղահանվածների վերադարձի մասին օրենքը, որը ենթադրում է մցխեթցի թուրքերի վերադարձ Վրաստան: Այս օրենքն ընդունվել է ԵԽ ճնշման արդյունքում:
Պապավայի կարծիքով, եթե Հայաստանն զգա, որ ԼՂ խնդիրը լուծվում է ոչ ի օգուտ իրեն, որոշ ուժեր կարող են հակամարտություն սադրել Ջավախքում:
Նրա ներկայացմամբ, Վրաստանը հիմա շատ ծանր վիճակում է, քանի որ մցխեթցի թուրքերի վերադարձի ամենամեծ հակառակորդները Ջավախքում բնակվող հայերն են, եւ եթե տեղի ունենա հայ-թուրքական ամբողջական մերձեցում, ապա Ջավախքի հայերը չեն հակադրվի մցխեթցի թուրքերի վերադարձին: Պապավան նշել է նաեւ, որ իրականում, ամեն ինչ ավելի բարդ է, քանի որ դա կարող է նոր էթնիկ խնդիր ստեղծել տարածաշրջանում: