Սլովակիայի առաջին վարչապետ Յան Չառնոգուրսկին եւ Սլովակիայի ազգային խորհրդի առաջին ղեկավար Ֆրանթիշեկ Միկլոշկուն շնորհավորական ուղերձ են հղել Լեռնային Ղարաբաղի հանրապետության նախագահ Բակո Սահակյանին ԼՂՀ անկախության օրվա առթիվ:
«Լեռնային Ղարաբաղի հանրապետությունը ծնվել է իր գոյության համար ծանր պայքարի արդյունքում: Հանրապետության բնակիչները բացառիկ հերոսություն եւ հայրենասիրություն են դրսեւորել: Նրանք պաշտպանել են իրենց կանանց, երեխաներին, պաշտպանել են իրենց տարածքը եւ հաջողության են հասել այդ կռվում: Մենք այցելել ենք ձեր երկիրը եւ տեսել, թե ինչպես ձեր ժողովրդի ռազմական քաջագործությունները վերածվել են աշխատասիրության եւ հոգատարության հին քրիստոնեական մշակույթի հանդեպ»,-ասված է շնորհավորական ուղերձում:
Նամակի հեղինակները հաստատում են, որ Լեռնային Ղարաբաղի բնակիչների հերոսությունը պահպանվում է մինչ օրս: «Նրանք հասկանում են, որ դեռ վաղ է զենքերը վայր դնելու համար: Նրանք իրականացնում են իրենց հայրենասիրական պարտքը: Դրա հետ մեկտեղ կառուցում են իրենց երկիրը, քաղաքները, գյուղատնտեսությունը: Լեռնային Ղարաբաղի բնակիչները ողջ աշխարհի հետ համերաշխության բարոյական իրավունք ունեն»,-ասված է շնորհավորական ուղերձում:
