«Ժառանգություն» կուսակցությունը շնորհավորական ուղերձ է հղել ԼՂՀ անկախության 20-ամյակի կապակցությամբ, որտեղ կրկին շեշտում է Հայաստանի կողմից ԼՂՀ անկախության ճանաչման կարեւերությունը:
Ուղերձում, մասնավորապես, ասվում է.
«ԼՂՀ անկախության հռչակման 20-ամյակի կապակցությամբ շնորհավորում ենք համայն հայությանը եւ մաղթում նոր հաջողություններ ազգային նպատակների իրականացման ճանապարհին:
20 տարի առաջ համաժողովրդական հերոսական մաքառման արդյունքում Հայաստանի, Արցախի եւ ամբողջ աշխարհի հայության զորակցությամբ հիմք դրվեց հայկական երկրորդ պետականությանը` Լեռնային Ղարաբաղի Հանրապետության անկախությանն ու ինքնիշխանությանը:
Ցավով պետք է արձանագրել, որ 1994 թվականի զինադադարով ավարտված մեր ռազմական հաղթանակները տարիների ընթացքում ՀՀ բոլոր երեք իշխանությունների արտաքին եւ ներքին անխոհեմ քաղաքականությունների արդյունքում փոխակերպվեցին դիվանագիտական պարտուրթյունների, որոնք շարունակվում են մինչ օրս: Հայաստանի գործող իշխանություններն էլ երկու անգամ տապալեցին Հայաստանի կողմից ԼՂՀ անկախությունը ճանաչելու «Ժառանգություն» կուսակցության եւ նրա առաջնորդ Րաֆֆի Հովհաննիսյանի օրենսդրական նախաձեռնությունը: Այդուհանդերձ ԼՂՀ անկախությունը մնում է անհերքելի պատմական փաստ՝ հենված Արցախի հայության ինքնորոշման իրավունքի անվիճարկելի իրողության վրա:
Այս պատմական օրը մենք մեկ անգամ եւս հայտարարում ենք, որ «Ժառանգություն» կուսակցությունը ճանաչում է Լեռնային Ղարաբաղի Հանրապետության անկախությունը:
Մենք միեւնույն ժամանակ կոչ ենք անում Հայաստանի եւ Սփյուռքի բոլոր քաղաքական ու հասարակական կազմակերպություններին եւ առաջին հերթին իշխող կուսակցություններին` ճանաչել ԼՂՀ անկախությունը, նպաստել նրա վերաբնակեցմանն ու զարգացմանը եւ ձեռնամուխ լինել Հայաստանի ու միջազգային հանրության կողմից նրա ճանաչման գործընթացին»:
Հիշեցնենք, որ ուղիղ 20 տարի առաջ, սեպտեմբերի 2-ին Լեռնային Ղարաբաղի ժողովուրդը իր հավաքական կամքն արտահայտեց եւ հռչակեց իր անկախությունը:
