Երեւանի քաղաքապետ Կարեն Կարապետյանը սեպտեմբերի 5-ին տեղի ունեցած հերթական աշխատանքային խորհրդակցության ժամանակ անդրադարձել է սեպտեմբերի 3 ի երեկոյան Նոր Նորք վարչական շրջանում 2 աշխատակիցների մահվան ելքով անվավոր կռունկի սլաքի տապալման դեպքին:
Սա այս տարվա 4 րդ նմանատիպ դեպքն է մայրաքաղաքում:
Քաղաքապետարանի մամուլի ծառայությունից NEWS.am-ին հայտնում են, որ ըստ այդմ, քաղաքապետը պատասխանատու կառույցների ղեկավարներին հանձնարարել է խիստ ուշադրություն դարձնել անվտանգության նորմերի ապահովմանը: Այս համատեքստում, քանի որ հարցն ըստ էության Արտակարգ իրավիճակների նախարարության տիրույթում է, Կարեն Կարապետյանը նաեւ հանդիպել է Արտակարգ իրավիճակների նախարար Արմեն Երիցյանի հետ: Ձեռքբերված պայմանավորվածության համաձայն ստեղծվելու է հանձնաժողով, որը ամբողջովին ուսումնասիրելու է ոլորտում առկա խնդիրները` որպեսզի կառուցապատողները մասնագիտական գործունեություն ծավալեն բացառապես իրավական դաշտում`ապահովելով աշխատանքի անվտանգությունը: