Երեւան է ժամանել Կանադայի հանրային ծառայության հանձնաժողովի նախագահ տիկին Մարիա Բարրադոսը` մասնակցելու սեպտեմբերի 7-9-ը Երեւանում անցկացվող «Մասնագիտությունը հեռանկարում» միջազգային 5-րդ համաժողովին:
Այսօր` սեպտեմբերի 6-ին, նրան ընդունել է Հայաստանի քաղաքացիական ծառայության խորհրդի նախագահ Մանվել Բադալյանը:
Քաղծառայության խորհրդի մամուլի ծառայությունից NEWS.am-ին հայտնում են, որ հանդիպման ընթացքում քննարկվել են համաժողովի կազմակերպմանը, ինչպես նաեւ հանրային ծառայության ոլորտում երկու երկրների միջեւ գործակցության հնարավորություններին առնչվող հարցեր: ՀՀ քաղաքացիական ծառայության խորհրդի նախագահ Մանվել Բադալյանը կարեւորել է Երեւանում անցկացվող համաժողովը քաղաքացիական ծառայության բարեփոխումների ընդհանուր տենդենցների հստակեցման, փորձի փոխանակման եւ մասնակից երկրների միջեւ համագործակցության խորացման հեռանկարների տեսանկյունից:
Տիկին Բարրադոսը պատրաստակամություն է հայտնել փոխանցելու մրցութային հարցաշարերը որակապես բարելավելու եւ համակարգի համալրումը գիտելիքների ու արժանիքների գնահատման հիման վրա իրականացնելու ոլորտում կանադական փորձը: Երկուստեք կարեւորվել է պետական ծառայության ոլորտի կայունության ապահովման եւ քաղաքական զսպվածության սկզբունքների պաշտպանության հարցը: