Երեւանի քաղաքապետ Կարեն Կարապետյանն այսօր` սեպտեմբերի 7-ին, այցելել է քաղաքի մետրոպոլիտեն եւ ծանոթացել նրա տեխնիկական վիճակին, ընթացող աշխատանքներին եւ զարգացման ծրագրերին:
Քաղաքապետարանի մամուլի ծառայությունից NEWS.am-ին հայտնում են, որ նա հստակ խնդիր է դրել կարճ ժամկետում արդիականացնել մետրոպոլիտենի սարքավորումները` փոխարինելով ավտոմատացված նորագույն սարքավորումներով եւ հանձնարարվել է կազմել անհրաժեշտ ֆինանսական ծախսերի նախնական փաթեթ:
Այնուհետեւ քաղաքապետը հետեւել է նաեւ վերջերս մետրոյի կայարաններում տեղադրված տեսախցիկների աշխատանքին: Ուղեւորների անվտանգությունն ապահովելու նպատակով` «Անվտանգ Երեւան» ծրագրի շրջանակում Երեւանի 10 կայարաններում տեղադրվել է 186 տեսախցիկ, որոնց աշխատանքին, պլազմային մեծ մոնիտորներով, 24 ժամ անընդմեջ հետեւում են մետրոպոլիտենի համապատասխան ծառայության աշխատակիցները: Օրվա ավարտին տեսանյութերն ամբողջությամբ արխիվացվում են: Շուտով կավելանա եւս վեց մոնիտոր: Առաջիկայում տեսախցիկներ են տեղադրվելու նաեւ շարժակազմերի վագոններում:
Մետրոպոլիտենում կայացած խորհրդակցության ժամանակ զեկուցվել է, որ ՀՀ Անկախության 20-ամյակի կապացությամբ շուտով գործող 45 շարժակազմերին կավելանան եւս երկու` ամբողջությամբ վերանորոգված ու նորովի ձեւավորված շարժակազմեր:
Կարեն Կարապետյան, հանձնարարել է Սասունցի Դավիթ, Շենգավիթ, Գործարանային, Գարեգին Նժդեհ եւ Հանրապետության հրապարակի մետրոկայարանների հիմնանորոգման աշխատանքների համար ուսումնասիրել եւ կազմել զարգացման հստակ ծրագիր:
«Մետրոյի հետագա զարգացման ռազմավարությունը պատկերացնելու համար մետրոպոլիտենի տնօրինությանը հանձնարարվել է մշակել կարճաժամկետ, միջին եւ երկարաժամկետ ծրագիր: Ի~նչ խոսք, նոր կայարանների կառուցման խնդիրը անհրաժեշտություն է, սակայն ցավոք այսօր այն բավականին թանկ հաճույք է: Միայն Աջափնյակ թաղամասի երկու կայարանների կառուցումը ավելի քան 200-250 միլիոն դոլար կարժենա: Բայց եւ այնպես վստահ եմ` կգա այն օրը, երբ կունենանք նոր կայարաններ: Նաեւ դրա համար է, որ առաջարկել ենք ծրագիր եւ հայեցակարգ ներկայացնել» - նշել է քաղաքապետը: