Մոսկվայի գրախանութներում ոչ մի գիրք հնարավոր չէ գտնել Հայաստանի եւ Ղարաբաղի մասին: Նման կարծիք է հայտնել ռուսաստանցի քաղաքագետ, Սեւծովյան եւ Կասպյան տարածաշրջանի քաղաքական եւ սոցիոլոգիական հետազոտությունների ինստիտուտի տնօրեն Վլադիմիր Զախարովը` հայ պատմաբան Ռուբեն Գալիչյանի «Պատմության առասպելականացում. Ադրբեջան, Հայաստան, հորինվածքներ եւ փաստեր» գրքի շնորհանդեսի ժամանակ:
Միաժամանակ, ըստ նրա, գրադարակների վրա բավականին մեծ քանակությամբ ադրբեջանական գրականություն կա:
«Մեր ինստիտուտում երկու գիրք կա Նախիջեւանի եւ երկուսը` Ղարաբաղի մասին, ընդ որում` նրանցից մեկը` քառասուն տպագիր էջ է կազմում: Հարկավոր է գումար` դրանք հրատարակելու համար: Սակայն քանի անգամ էլ դիմել եմ հայ գործարարներին` անիմաստ է եղել: Ադրբեջանական գրականության լիությունը բացատրում են «նավթատարի» առկայությամբ: Իսկ դուք բնակարաններ մի նվիրեք Քսենիա Սոբչակին եւ այլոց, ու այդ գումարները դրեք հրատարակչության մեջ»,- խորհուրդ է տվել Զախարովը հայ գործարարներին:
Հայաստանում, ըստ նրա, հրաշալի հետազոտություններ են կատարվում, սակայն հայերենով: «Ռուսաստանում, ցավոք, ոչ բոլորն են հայերեն կարդում: Դուք դա հրատարակում եք ձեզ համար, սակայն փորձեք հրատարակել աշխարհի համար»,-ավելացրել է քաղաքագետը:
