Ռուսաստանն Անկարայի եւ Բաքվի հետ հարաբերությունները չի կառուցում ի վնաս հայ-ռուսական հարաբերությունների: Այդ մասին հայտնել է ՌԴ Պետդումայի՝ ԱՊՀ երկրների եւ հայրենակիցների հետ կապերի հանձնաժողովի նախագահ Կոնստանտին Զատուլինը:
Նրա խոսքով, Հայաստանին ու Ռուսաստանին կապում է ոչ միայն բազմամյա պատմությունը եւ մշակույթը, այլ նաեւ ռազմա-քաղաքական եւ տնտեսական սերտ համագործակցությունը:
Զատուլինը նշել է, որ Ռուսաստանը սկզբունքային դիրքորոշում ունի Հայաստանի համար կարեւություն ներկայացնող հարցերում: Օրինակ, չնայած Թուրքիայի հետ հարաբերություններին` Ռուսաստանը 1995 թվին ճանաչել է Հայոց Ցեղասպանությունը, որը մինչ օրս հարուցում է թուրքական կողմի դժգոհությունը:
Ինչ վերաբերվում է հարցին, թե ռուսական կողմը օժանդակելո՞ւ է Հայաստանին` ԼՂ հակամարտության ռազմական սրման դեպքում, Զատուլինը հիշեցրել է ՌԴ նախագահ Դմիտրի Մեդվեդեւի խոսքերը, որ Ռուսաստանը պատրաստ է իրականացնել իր պարտականությունները ՀԱՊԿ շրջանակներում, եթե Հայաստանը ենթարկվի ռազմական ագրեսիայի:
«Վերոնշյալ հայտարարությունը վերջ է դրել բոլոր շահարկումներին»,-կարծում է Զատուլինը` նշելով, որ Ռուսաստանը ջանքեր է գործադրում հակամարտության խաղաղ կարգավորման ուղղությամբ: