ԼՂՀ պաշտպանության բանակի մամուլի ծառայությունը հերքում է Բաքվի լրատվամիջոցներով տարածված այն լուրը, թե իբր հայկական ուժերի կողմից հրադադարի խախտման արդյունքում Ֆիզուլիի ուղղությամբ գլխից վիրավորվել է ադրբեջանական բանակի սպա Գաբիլ Աբդուլաեւը:
Այս կապակցությամբ, ԼՂՀ ՊԲ մամուլի ծառայությունից NEWS.am-ին հայտնում են.
«Ադրբեջանական քարոզչությունը միջազգային հանրության կարծիքը ապակողմնորոշելու նպատակով իր հնարածին տեղեկատվությամբ տակավին փորձում է ղարաբաղյան ուժերի նախահարձակ գործողություններով պայմանավորել սեփական զինուժում պարբերաբար տեղի ունեցող արտակարգ պատահարները: Մասնավորապես, այսօր Բաքվի լրատվամիջոցներով տարածված այն լուրը, թե իբր հայկական ուժերի կողմից հրադադարի խախտման արդյունքում Ֆիզուլիի ուղղությամբ գլխից վիրավորվել է ադրբեջանական բանակի սպա Գաբիլ Աբդուլաեւը, ոչ միայն չի համապատասխանում իրականությանը, այլեւ իր նախահարձակ գործողությունները ինչ-որ կերպ արդարացնելու եւ սեփական զինուժում ոչ կանոնադրական փոխհարաբերությունների հողի վրա կատարված արտակարգ պատահարը ղարաբաղյան կողմի վրա բարդելու նպատակային քայլ է:
ԼՂՀ ՊԲ լրատվության եւ քարոզչության բաժինը հերքում է այդ ապատեղեկատվությունը եւ ամենայն պատասխանատվությամբ հայտարարում, որ Արցախի զինված ուժերը մշտապես հավատարիմ են մնում կողմերի միջեւ ձեռքբերված հրադադարի մասին պայմանավորվածությանը եւ անվերապահորեն կատարում դրա պահանջները»: