Մեզ մոտ հայկական շաբաթ է, ֆրանսիական «Le Monde»-ի բլոգում գրում է Առնո Լեպարմանտիեն:
Նիկոլա Սարկոզին պետական այցով Հայաստան է այցելելու հոկտեմբերի 6-ին` Փարիզում Հայաստանի նախագահ Սերժ Սարգսյանին ընդունելուց հետո: Նրան ուղեկցելու են հայ համայնքի երկու ներկայացուցիչներ` Շառլ Ազնավուրը եւ Օ դը Սենի գլխավոր խորհրդի նախագահ Պատրիկ Դեւեջյանը:
Վերջինս ջանք չէր խնայում նախագահի վրա հարձակվելու համար, սակայն ընտրություններից վեց ամիս առաջ Սարկոզիին անհրաժեշտ է սիրաշահել հայ համայնքին: Կամուրջներն այրված չէին, Դեւեջյանը մինչ ամառային արձակուրդները հանդիպել էր նախագահին` որդու ուղեկցությամբ, Օ դը Սենի մասին խոսելու համար:
Երեւան կատարելիք այցը փոխարենը թույլ կտա հանդարտեցնել նրանց, ովքեր կոչ են անում քրեական պատասխանատվություն սահմանել Հայոց ցեղասպանության ժխտման համար: Այդ նախագիծը ներկայումս արգելափակված է Ֆրանսիայի Սենատում: «Մեզ անհրաժեշտ է կառավարել նրանց, ովքեր հիշատակի օրենքներ են ցանկանում, բայց մենք Թուրքիայի հետ պատերազմի չենք գնա: Այսպիսով նախագահը ժեստ է անում` ուղեւորվելով Հայաստան»,-ասել է նախագահի խորհրդականը:
Սոցիալիստներից նախագահի թեկնածու Ֆրանսուա Օլանդը, սեպտեմբերի 26-ին, Ալֆորվիլում կայացած հանդիպմանը, ոգեշնչված Սենատում սոցիալիստների հաղթանակից, վերին պալատի նախագահի հավանական թեկնածու Ժան Պիեռ Բելին կոչ էր արել զբաղվել հիշատակված նախագծով:
