Թուրքական դատարանը երեքշաբթի արդարացրել է Amnesty International-ի թուրքական գրասենյակի նախկին ղեկավար Թաներ Քըլըչին եւ եւս երեք իրավապաշտպանների՝ ահաբեկչության մեղադրանքով ձգձգված գործի կրկնակի քննության ընթացքում, հաղորդում է Reuters-ը՝ վկայակոչելով իրավապաշտպանների խմբի հայտարարությունը։
2020 թվականին Քըլըչը դատապարտվել է ավելի քան 6 տարվա ազատազրկման՝ քուրդ քարոզիչ Ֆեթուլլահ Գյուլենին աջակցելու մեղադրանքով, որին Անկարան մեղադրում է 2016 թվականին հեղաշրջման փորձը կազմակերպելու մեջ։
Երեք այլ իրավապաշտպաններ դատապարտվել են երկու տարի մեկ ամսվա ազատազրկման՝ «ահաբեկչական կազմակերպությանն աջակցելու համար»: Ամբաստանյալները հերքում են մեղադրանքները:
Առաջին ատյանի դատարանը վճռել է արդարացնել բոլոր չորս մեղադրյալներին՝ բավարար ապացույցների բացակայության պատճառով, հայտնել է իրավապաշտպան խումբը:
Քննադատներն ասում են, որ թուրքական դատարանները ճնշում են խոսքի ազատությունն ու քաղաքական այլակարծությունը երկրի նախագահ Ռեջեփ Էրդողանի ճնշման ներքո, սակայն կառավարությունը հերքում է այդ մեղադրանքները:
