Թուրքիայի Վան քաղաքում «Մետաքսի ճանապարհ 2011» տուրիզմի եւ արդյունաբերության ցուցահանդեսին մասնակցել են ն Թուրքիայի արեւելյան նահանգների տուրիզմի եւ մշակույթի վարչությունները, Թուրքիայի Ճամփորդական գործակալությունների միության նահանգային կառույցները, Իրանից եւ Հայաստանից ժամանած զբոսաշրջային գործակալությունների ներկայացուցիչները:
Ինչպես տեղեկացնում է NEWS.am-ի թղթակիցը Վանից, «Մետաքսի ճանապարհ 2011» ցուցահանդեսին Հայաստանից մասնակցել են Հայաստանի արդյունաբերողների եւ գործարարների (գործատուների) միության «Աջակցություն հայ-թուրքական մերձեցմանը» ծրագրի ներկայացուցիչը եւ հայկական մի քանի զբոսաշրջային գործակալությունների ներկայացուցիչներ:
Հայկական պատվիրակության տաղավարը լուրջ հետաքրքրություն է առաջացրել թե Թուրքիայի քաղաքացիների, թե Իրանից ժամանած հյուրերի մոտ: Հայկական տաղավար են այցելել եւ անձամբ ողջունել հայաստանցի մասնակիցներին Թուրքիայի մշակույթի եւ տուրիզմի նախարար Էրթուղրուլ Գյունայը, Վանի նահանգապետ Մունիր Քարաօղլուն, Վանի քաղաքապետ Բեքիր Քայան եւ այլ պաշտոնյաներ:
Ցուցահանդեսի բացումն իրականացրել է Թուրքիայի մշակույթի եւ տուրիզմի նախարար Էրթուղրուլ Գյունայը, ով իր ելույթում ողջունել է մասնակիցներին՝ հիշատակելով, որ Հայաստանից եւս մասնակիցներ կան: Բացման խոսքով հանդես եկած մյուս բարձրաստիճան պաշտոնյաները եւս ողջունել են հայաստանցի հյուրերի մասնակցությունը տարածաշրջանային խոշոր ցուցահանդեսին:
Ցուցահանդեսի ընթացքում Հայ եւ թուրք զբոսաշրջային ընկերությունների ասոցիացիայի համանախագահը Թուրքիայի մշակույթի եւ տուրիզմի նախարարության ներկայացուցչի հետ հանդիպման ժամանակ քննարկել է պատմական Արեւմտյան Հայաստանի մի շարք վայրերում՝ Անիում, Կարսում, Մուշում, Էրզրումում եւ Երզնկայում գտնվող հայկական պատմամշակույթային ժառանգության պահպանման եւ դրանց ճիշտ ներկայացման խնդիրները: