Կոտրել են ԵԱՀԿ Խորհրդարանական վեհաժողովի կայքը:
www.oscepa.org հասցեն հավաքելիս տեղի է ունենում վերահասցեագրում ինչ-որ http://delixana.web44.net/ կայքին:
Այստեղ սպիտակ ֆոնին հայտնվում է Ադրբեջանի եւ Լեռնային Ղարաբաղի քարտեզը, որը ներկված է ադրբեջանի դրոշի գույներով եւ ԵԱՀԿ Մինսկի խմբի համանախագահների լուսանկարը` վրան երկու կարմիր գիծ:
Այս ողջ «հաքերային ստեղծագործության» տակ կա անգլերեն գրություն. «Ադրբեջանի պաշտպաններն են եղել այստեղ: Ոչ ոք եւ ոչինչ չի մոռացվել: Ղարաբաղը մերն է»:
Համանախագահների լուսանկարի տակ անգրագետ անգլերենով գրված է. «Թագավորները դեռ չեն մահացել»:
Բոլոր գրություններն ուղեկցվում են բազմաթիվ բացականչական նշաններով: Երեւում է, ադրբեջանցի հաքերները չափից ավելի ոգեւորված են եղել իրենց «աշխատանքով»:
Նրանք չեն մոռացել նաեւ գովազդել իրենց, ներկայացնելով WwW.Azdefacers.OrG հասցեն: Սակայն այդ հղման վրա սեղմելիս, օգտագործողների առաջ է հայտնվում սեքսուալ աղջիկների լուսանկարներով տղամարդկանց ամսագիր եւ անգլերենի դասընթացների առաջարկ: