Մշակութային ոլորտում Երեւանի եւ իտալական քաղաքների միջեւ համագործակցությանն առնչվող հարցեր են քննարկվել Երեւանի քաղաքապետ Կարեն Կարապետյանի եւ Ֆլորենցիայի Ռոմուալդո Դել Բիանկա ֆոնդի տնօրեն Պաոլո Դել Բիանկոյի հանդիպման ժամանակ:
Քաղաքապետարանի մամուլի ծառայությունից NEWS.am-ին հայտնում են, որ Պաոլո Դել Բիանկոն Երեւանի քաղաքապետին ներկայացրել է իր ղեկավարած ֆոնդի գործունեությունը, որը հիմնականում ուղղված է մշակութային երկխոսությունների հաստատմանն ու ընդլայնմանը: Տեղեկացնելով, որ շուտով տեղի է ունենալու նաեւ ֆոնդի համացանցային պորտալի շնորհանդեսը, Պաոլո Դել Բիանկոն պատրաստակամություն է հայտնել պորտալի միջոցով ներկայացնել Երեւանը` որպես մշակութային եւ զբոսաշրջային գրավիչ միջավայր, այցելուներին ներկայացնելով ոչ միայն հայկական մշակույթը, այլեւ տնտեսության այն ճյուղերը, որոնք կարող են նաեւ ներդրումային հետաքրքրություն ներկայացնել:
Կարեն Կարապետյան իր հերթին նշել է , որ բոլոր հնարավորությունները պետք է օգտագործել իտալական քաղաքների հետ կապերն ամրապնդելու համար: Նա համոզմունք է հայտնել, որ ֆոնդը եւս մեկ հրապարակ կլինի Երեւանը միջազգային հանրությանը ներկայացնելու համար:
Հանդիպմանը ներկա Հայաստանում Իտալիայի դեսպան Բրունո Սկատինին նույնպես կարեւորել է քաղաքների միջեւ մշակութային երկխոսության անհրաժեշտությունը եւ նշել, որ ֆոնդն իր ուրույն դերակատարությունը կունենա եւ կօգնի զարգացնելու երկկողմ կապերը` նպաստելով , որ Հայաստանը ճանաչում ունենա տարբեր ասպարեզներում:
Ձեռքբերված պայմանավորվածության համաձայն` երկկողմ աշխատանքային խումբը կքննարկի եւ գործակցության կոնկրետ առաջարկություն կներկայացնի: