Լեռնային Ղարաբաղից բռնի տեղահանվածների ընդհանուր թիվը մոտ օրերս կարող է հասնել 120 հազարի։ Սա մոտավորապես համապատասխանում է հայկական անկլավի ողջ բնակչությանը։ Այս մասին հայտարարել է ՄԱԿ-ի փախստականների հարցերով գերագույն հանձնակատարի գրասենյակի ներկայացուցիչ Կավիտա Բելանին, գրում է BBC-ն։
Ըստ ՄԱԿ Փախստականների հարցերով գերագույն հանձնակատարի վարչության ներկայացուցչի, հոգնած և վախեցած մարդկանց հսկայական ամբոխ է հավաքվել Հայաստանի գրանցման կենտրոններում, որտեղ ընդունում են փախստականներին, որոնք փաստացի ինը ամիս ապրել են շրջափակման մեջ։
«Մենք պատրաստ ենք ընդունել մինչև 120 հազար մարդու, բայց հիմա, այս փուլում, շատ դժվար է կանխատեսել, թե քանի հոգի կլինեն»,- վստահեցրել է Կավիտա Բելանին՝ պատասխանելով փախստականների թվի մասին հարցին:
Նա նաև պարզաբանել է, որ ի սկզբանե Երևանը ակնկալում էր ընդունել 70-90 հազար փախստական, սակայն այդ թվերը թարմացման կարիք ունեն։
Լեռնային Ղարաբաղից փախստականների ընդհանուր թվի գրեթե մեկ երրորդը երեխաներ են, լրագրողներին հայտնել է ՅՈՒՆԻՍԵՖ-ի տարածաշրջանային տնօրեն Ռեգինա դե Դոմինիսիսը։
«Մեզ ամենաշատը մտահոգում է այն, որ [այս երեխաներից] շատերը բաժանվել են իրենց ընտանիքներից», - ավելացրել է նա:
Կարմիր խաչի և Կարմիր մահիկի ընկերությունների միջազգային ֆեդերացիայի ներկայացուցիչ Հիշամ Դիաբի խոսքով, տեղահանվածներից շատերը՝ և՛ մեծահասակները, և՛ երեխաները, լիովին հյուծված են և հրատապ հոգեբանական աջակցության կարիք ունեն։
«Քիչ չեն այն ընտանիքները, որտեղ երեխաներն այնքան թույլ են, որ նրանք պարզապես կորցնում են գիտակցությունը հենց իրենց ծնողների գրկում», - ասել է նա:
Կարմիր Խաչի միջազգային կոմիտեի ղեկավարներից մեկի՝ Կառլոս Մորազանիի խոսքով, ապագայում Կարմիր Խաչը կենտրոնանալու է Ղարաբաղում դեռևս մնացածներին օգնություն տրամադրելու վրա։ Նրանց կուղարկվեն անհատական փաթեթներ, որոնք ներառում են հիմնական սննդամթերք և անձնական հիգիենայի պարագաներ։
«Մենք ակնկալում էինք, որ տարհանման գործընթացը ավելի երկար կտևի», - խոստովանել է նա: «Չնայած այս շաբաթ մենք կարողացանք շատ մարդկանց տարհանել, նրանցից շատերը արդյունքում հայտնվել են անելանելի վիճակում»:
