Յոթի խմբի (G7) երկրներն Իրանին կոչ են անում վերադարձնել Ատոմային էներգիայի միջազգային գործակալության (ԱԷՄԳ) հավատարմագրից զրկված տեսուչներին։ Այս մասին նշվել է «յոթնյակի» դիվանագիտական գերատեսչությունների ղեկավարների համատեղ հայտարարությունում, որն ընդունվել է Տոկիոյում, երկօրյա հանդիպման արդյունքների հիման վրա։
«Մենք կոչ ենք անում Իրանին օպերատիվ կերպով կատարել իր իրավաբանական եւ քաղաքական պարտավորությունները միջուկային չտարածման առումով, ներառյալ ԱԷՄԳ-ի հետ անվերապահ համագործակցությունը։ Մենք համառորեն կոչ ենք անում Իրանին չեղարկել ԱԷՄԳ տեսուչների հավատարմագրերի հետկանչը, որը լրջորեն է անդրադառնում Իրանում գործակալության տեսչության արդյունավետ իրականացման վրա»,- նշվել է հայտարարությունում։
Սեպտեմբերի 17-ին ԱԷՄԳ գլխավոր տնօրեն Ռաֆայել Գրոսին տեղեկացրել էր, որ Իրանը որոշում է կայացրել հետ կանչել ուրանի հարստացման օբյեկտներում ստուգում իրականացնող մի քանի տեսուչների հավատարմագրումը։ Գրոսին չի նշել նրանց թիվը, բայց տեղեկացրել է, որ այդ քայլը կկրճատի երկրում ստուգումներ կատարելու գործակալության հնարավորությունները։
