Ռուսաստանի եւ Հայաստանի զինծառայողները այսօր` հոկտեմբերի 31-ին, հաջողությամբ ավարտեցին լեռնային տեղանքի պայմաններում մղվող պաշտպանական մարտերի առաջադրանքների մշակման համատեղ ուսումնական վարժանքը: Այս մասին հաղորդում է հարավային ռազմական շրջանի մամուլի ծառայությունը:
Ռուսական 102-րդ ռազմակայանի ստորաբաժանումները ներկա պահին «Ալագյազ» հրաձգարանից շարժվում են դեպի մշտական տեղակայման վայր` քաղաք Գյումրի:
Համատեղ զորավարժությունների ընթացքում մշակվել են ռազմական, ինժեներական հետախուզության տարրեր, կատարելագործվել են հրետանային, տանկային եւ մոտոհրաձգային ստորաբաժանումների գործողությունները, հակաօդային պաշտպանության միջոցները, ինչպես նաեւ կատարվել են մարտական պաշտպանության առաջադրանքներ:
Ուսումնական կրակոցների ընթացքում ռուսական ստորաբաժանումները ծախսել են մոտ 10 հազ. տարբեր տեսակի ռազմամթերք:
Համատեղ զորավարժություններին, որը մեկնարկել էր հոկտեմբերի 27-ից, ռուսական կողմից մասնակցել են 500-ից ավելի զինծառայողներ եւ մոտ 200 միավոր զենք եւ ռազմական տեխնիկա: Ռազմական ստորաբաժանումների գործողությունները կատարվում էին БМП-2 եւ Т-72Б տանկերի, ինքնագնաց «Գվոզդիկա» հաուբիցների, ականանետների, հակատանկային կառավարման «Կոնկուրս» հրթիռների, զենիթային ինքնագնաց «Շիլկա» սարքերի օգնությամբ:
Հայաստանի զինված ուժերից ուսումնավարժանքներին մասնակցում էին առանձին մոտոհրաձգային վաշտի մոտոհրաձգային զորաջոկատը, հատուկ նշանակության ուժերի եւ ռազմական ավիացիայի միավորումները` շուրջ 300 զինծառայող, կիրառվել է 50 միավոր զենք եւ ռազմական տեխնիկա, ինչպես նաեւ 2 հատ Մի-8 ուղղաթիռ: