Փետրվարի 2-ին Հայաստանում Չինաստանի Ժողովրդական Հանրապետության դեսպանատանը տեղի է ունեցել չինական Ամանորի (Գարնան տոն) տոնակատարությունը։
Ողջույնի խոսքով հյուրերին դիմել է Հայաստանում Չինաստանի դեսպան Ֆան Յոնգը, ով շնորհավորել է հավաքվածներին տոնի առթիվ և նշել, որ հայ-չինական հարաբերությունները նոր մակարդակի են բարձրացել։
Ելույթ է ունեցել նաև Չինաստանում Հայաստանի նախկին դեսպան Սերգեյ Մանասարյանը։ Նա նշել է, որ բոլոր ոլորտներում հայ-չինական հարաբերությունների զարգացումն ավելի ու ավելի շատ նոր ու հետաքրքիր նախագծեր է ստեղծում։
Միջոցառմանը ներկա են գտնվել այն դպրոցների աշակերտները, որտեղ չիներեն է դասավանդվում, «Կոնֆուցիուս» ինստիտուտի ուսանողները, պարային խմբեր և մարտարվեստի ներկայացուցիչներ։
Չինական Նոր տարին, որը բառացի թարգմանվում է որպես Գարնանային տոն, հին ժամանակներից ի վեր Չինաստանի գլխավոր և ամենաերկար տոնն է։
Չինաստանում Ամանորը նշում են լուսնային օրացույցի համաձայն, ինչի պատճառով տարեթիվը ամեն տարի փոխվում է։ Չինաստանում տոնի առաջին օրը համընկնում է ձմեռային արևադարձից հետո երկրորդ նորալույսի հետ (այսինքն՝ դեկտեմբերի 21-ից հետո)։ Ի դեպ, Չինաստանում դիմավորելու են ոչ թե 2024 թվականը, այլ 4721 թվականը։
Ամեն տարի հովանավորվում է կենդանակերպի 12 որոշակի գույնի կենդանիներից մեկը, որը համապատասխանում է հինգ տարրերից մեկին (հող, ջուր, կրակ, մետաղ, փայտ): Չինական Նոր տարին 2024 թվականի խորհրդանիշը կլինի Վիշապը և Փայտ տարրը, իսկ տարվա գլխավոր գույնը՝ կանաչը։ Վիշապը կենդանակերպի բոլոր նշանների մեջ միակ առասպելական արարածն է։ Ենթադրվում է, որ այն բերում է հաջողություն և բարգավաճում:
