Ձմռան նախապատրաստական աշխատանքների հետ կապված հերթական աշխատանքային խորհրդակցության ժամանակ Երեւանի քաղաքապետի առաջին տեղակալ, քաղաքապետի պաշտոնակատար Տարոն Մարգարյանին զեկուցվել է, որ սանմաքրման ձեռնարկությունների գերակշիռ մասը պատրաստ են եղանակային փոփոխություններին:
Երեւանի քաղաքապետարանի լրատվական ծառայությունից NEWS.am-ին հայտնում են, որ ձեռք է բերվել 625 տոննա աղ, 1467 խորանարդ մետր ավազ, 274 միավոր մեքենամեխանիզմ վերազինվել եւ պատրաստ է շահագործման: Կատարվել են վարչական շրջանների տարեկան բյուջեով եւ ծրագրերով նախատեսված բազմաբնակարան շենքերի թեք եւ հարթ տանիքների, շքամուտքերի վերանորոգման աշխատանքներ: Գույքագրվել են այն ենթակառուցվածքները, որոնք կարող են խնդիրներ առաջացնել ձմռան պայմաններում եւ որոնք լրացուցիչ ֆինանսավորում են պահանջում: Տարոն Մարգարյանը նշել է, որ քաղաքապետարանը պատրաստ է աջակցել այդ հարցերում, միեւնույն ժամանակ նշելով, որ այդ աշխատանքներում ակտիվորեն պետք է ներգրավել համատիրություններին:
«Որտեղ խնդիրներ կլինեն, պատրաստ ենք աջակցել: Պետք է հետեւողական լինել համատիրությունների աշխատանքների եւ հավաքագրված գումարների նպատակային օգտագործման հարցում։ Պետք է հնարավորինս աջակցենք համատիրությունների կայացմանը, որպեսզի բնակիչների կողմից առաջ քաշված շատ խնդիրներ լուծվեն հենց համատիրությունների միջոցներով»,- նշել է Տարոն Մարգարյանը եւ հանձնարարել վարչական շրջանների ղեկավարներին առաջիկա մեկ ամսվա ընթացքում ուսումնասիրել առկա խնդիրները եւ ձեռնարկել համապատասխան միջոցառումներ:
