Իրանի պաշտպանության նախարար Մոհամադ Ռեզա Աշթիանին Հայաստանի գործընկեր Սուրեն Պապիկյանի հետ հանդիպման ժամանակ չորեքշաբթի ասել է, որ չի կարելի թույլ տալ, որպեսզի Կովկասյան շրջանը դառնա մրցակցության տեղ այլ կողմերի համար։

Բրիգադի գեներալ Աշթիանին, IRNA-ի թղթակցի խոսքով, հայտնել է, որ «տարածաշրջանի սահմաններից դուրս անվտանգության ձգտումը հակառակ արդյունք կունենա, տարածաշրջանը կվերածի հակամարտության տեղի եւ կստեղծի լրացուցիչ խնդիրներ տարածաշրջանային խաղաղության եւ կայունության համար»։

Պապիկյանի հետ հանդիպման ժամանակ Իրանի ՊՆ կենտրոնատեղիում Աշթիանին կարծիքներ է փոխանակել հարցերի լայն շրջանակի վերաբերյալ, ներառյալ երկկողմ հարաբերությունները Թեհրանի եւ Երեւանի միջեւ, գրել է իրանական ԶԼՄ-ն։

Հարեւանների հետ հարաբերությունների ամրապնդումը Իրանի արտաքին քաղաքականության մի մասն է, բայց Հայաստանը հատուկ նշանակություն ունի, եւ հարաբերությունները երկու երկրների միջեւ ավելանում են տարբեր ոլորտներում Հայաստանի անկախացումից հետո, ասել է նա։

Իրանի պաշտպանության նախարարը նաեւ ասել է, որ Իրանը միշտ պաշտպանել է համապարփակ խաղաղությունն ու կայունությունը տարածաշրջանում։

Իրանի վճռական դիրքորոշումը տարածաշրջանի երկրների տարածքային ամբողջականության եւ ինքնիշխանության իրավունքի եւ միջազգայնորեն ճանաչված սահմանների անփոփոխության աջակցությունն է, ընդգծել է Աշթիանին՝ ավելացնելով, որ Կովկասյան տարածաշրջանի հարցում Իրանը մնում է հավատարիմ այդ քաղաքականությանը եւ կաջակցի ուղիղ բանակցություններին Ադրբեջանի եւ Հայաստանի միջեւ, եւ որ դա համարում է խաղաղության, առաջընթացի եւ զարգացման հիմքը։

ՀՀ պաշտպանության նախարարն, իր հերթին, բարձր է գնահատել Իրանի հետ պատմական կապերը եւ բարեկամությունը եւ երկկողմ հարաբերությունների ամրապնդման պատրաստակամություն է հայտնել։

Շատ կարեւոր է, որ երկու երկրներն ունեն նման մոտեցումներ տարածաշրջանային կայունության հարցում, մենք պետք է ձգտենք ավելի սերտ համագործակցության՝ տարածաշրջանային անվտանգության հասնելու եւ զարգացման համար, ավելացրել է Պապիկյանը։