Որքանո՞վ է կառավարության գործունեությունը հմապատասխանում ԱԺ կողմից հաստատված ծրագրին, որտեղ գրված է մի բան և դուք անում եք լրիվ այլ բան, կամ ճիշտ հակառակը. Սա ինչպե՞ս կմեկնաբանեք: Այս մասին, այսօր՝ մարտի 15-ին, ԱԺ արտաքին հարաբերությունների հանձնաժողովում ՀՀ կառավարության ծրագրի (2021-2026 թթ.) 2023 թվականի կատարման ընթացքի եւ արդյունքների մասին զեկույցի քննարկման ժամանակ դիմելով ԱԳ նախարար Արարատ Միրզոյանին, հարցրեց «Հայաստան» խմբակցության պատգամավոր Արմեն Ռուստամյանը:
Նա նկատեց, որ ծրագրում գրված է, որ Հայաստանը շարունակելու է ակտիվորեն ներգրավված լինել ՀԱՊԿ-ի աշխատանքներին, մինչդեռ կատարողականի մեջ նշված է, որ Հայաստանը գործնականում սառեցրել է իր գործունեությունը ՀԱՊԿ-ում:
Ի պատասխան Արարատ Միրզոյանն ասաց. «Այո, ես ներկայացնում եմ 2021-2026թթ Կառավարության ծրագրի 2023թ հաշվետվությունը: Գործընկերների մի մասը կարծում եմ՝ լավ կգնահատեն կատարողականը համապատասխան ծրագրի, մի մասը, ելնելով քաղաքական նախատրամադրվածությունից, ցանկացած դեպքում կգնահատեն անբավարար: Ցանկացած միջին վիճակագրական երկրի համար է աքսիոմատիկ, որ ինչ-որ բաներ ինչքան էլ ջանք գործադրես չես կարող իրականացնել:
Տեղի են ունեցել իրադարձություններ, որոնք առանձին բաներ կատարելը դարձրել են անհնար: Հանգամանքների բերումով՝ ՀԱՊԿ-ում մասնակցությունը չենք արել այնպես, ինչպես 2021-ին ներկայացրել ենք ԱԺ-ում:
Արդեն ասաից՝ ինչու: Հայաստանի վրա տեղի է ունեցել հարձակում, մեր սահմանները խախտվել են՝ ՀԱՊԿ-ի կողմից համարժեք արձագանք չենք ստացել: Անգամ հրապարակային փաստի ընդունումը, որ, այո, ՀՀ ինքնիշխան տարածքը ոտնահարվել է, անգամ այս փաստի ընդունումը տեղի չի ունեցել: Այս պայմաններում ցանկացած ողջամիտ արձագանք կլինի ա) ապահովել այնուամենայնիվ, այդ փոխըմբռնումը եւ բ) եթե դա հնարավոր չէ, ապա առնվազն չտեսնել այդ գործընկերներին այնպիսին, ինչպիսին գրված է թղթի վրա: Հակառակը կլինի ինքնախաբեությունը:
Ես խոստացա նաեւ հարցով հանդես գալ. Պարոն Ռուստամյան, հիմա դուք ո՞ւմ կողմից եք՝ ՀԱՊԿ-ի թե՞ Հայաստանի:»,- պատասխանեց Արարատ Միրզոյանը:
«Ես ԱԺ-ի կողմից եմ այստեղ: Խորհրդարանական երկրում, երբ ծրագիր է ընդունվում, ապա Կառավարությունը պարտավոր է իրականացնել այդ ծրագիրը: Եթե իրավիճակն այնքան է ռադիկալ փոխվել, որ նոր իրավիճակ է առաջացել, մեծամսնություն կա ԱԺ-ում, թող կառավարությունը փոխի, գա նոր ծրագրով, ասի՝ ստեղծվել է նոր իրավիճակ, մենք պետք է ՀԱՊԿ-ից դուրս գանք: Սա է ձեւը»,- պատասխանեց Ռուստամյանը:
