Անշնորհակալ գործ է Ադրբեջանի գործողությունները մեկնաբանելը: Այս մասին այսօր՝ մարտի 27-ին, ԱԺ-ում լրագրողների հետ զրույցում հայտնեց ԱԺ նախագահ Ալեն Սիմոնյանը՝ պատասխանելով հարցին, թե Ադրբեջանի ԱԳ նախարարության հայտարարությունը արդյոք հնարավոր սադրանքի համար հողի նախապատրաստում է։
Խոսելով ապրիլի 5-ին Բրյուսելում սպասվող հանդիպման օրակարգին, որին մասնակցելու են Նիկոլ Փաշինյանը, Եվրահանձնաժողովի նախագահ Ուրսուլա ֆոն դեր Լայենն ու ԱՄՆ պետքարտուղար Էնթոնի Բլինքենը, Ալեն Սիմոնյանը չբացառեց, որ քննարկման թեմա լինի նաեւ եվրոպական խաղաղության գործիքը եւ դրա շրջանակներում Հայաստանին օժանդակություն տրամադրվի:
«Օրակարգի մասին չեմ կարող որեւէ բան ասել, երեկ եմ վերադարձել Հայաստան, եւ մինչ այս պահը հնարավորություն չեմ ունեցել իմ գործընկերների հետ շփվելու»,-ասաց նա:
Հարցին՝ հնարավո՞ր է այդ հանդիպմանը քննարկվի նաեւ Հայաստանի՝ ԵՄ անդամակցության հարցը, ԱԺ նախագահը պատասխանեց. «Նման հարց այս փուլում մենք չենք քննարկում եւ չեմ կարծում, որ նման բան կարող է տեղի ունենալ: Կտեսնենք՝ ինչ կլինի»: