Սանկտ Պետերբուրգի Ձերժինսկի շրջանային դատարանը մինչև մայիսի 25-ը կալանավորել է ահաբեկչությունն արդարացնելու գործով անցնող պրոֆեսիոնալ զբոսանավորդ, Zubrovka կահույքի ստուդիայի ստեղծող Նիկոլայ Կոնաշենկոյին, որը New Holland կլաստերի նախկին գլխավոր տնօրեն Ռոքսանա Շատունովսկայայի ամուսինն է, հայտնում է РБК-ն՝ հղում անելով Սանկտ Պետերբուրգի դատարանների միասնական մամուլի ծառայությանը։
Նախկինում նրան մեղադրանք էր առաջադրվել ահաբեկչությունը հրապարակայնորեն արդարացնելու համար (Քրեական օրենսգրքի 205.2-րդ հոդվածի 2-րդ մաս): Սույն հոդվածով նախատեսված առավելագույն պատիժը ազատազրկումն է՝ հինգից յոթ տարի ժամկետով։
Գործի հարուցման պատճառ են դարձել Կոնաշենկոյի հրապարակումները սոցիալական ցանցերում «Крокус»-ում տեղի ունեցած ահաբեկչության մասին։ Նա ձերբակալվել է մարտի 25-ին Սանկտ Պետերբուրգի Պուլկովո օդանավակայանում։ Նշվում է, թե ինքը նախատեսում էր թռչել Երեւան։ Կոնաշենոկը չի ընդունել իր մեղքը:
Ինչպես հայտնել է քաղաքային դատարանների մամուլի միասնական ծառայության ղեկավար Դարիա Լեբեդևան, երբ ձերբակալվել է օդանավակայանում, գործարարը «անպատշաճ վարք է դրսևորել, բղավել, ձեռքերը թափահարել և օգտագործել է կոպիտ, անպարկեշտ արտահայտություններ»։ Սա որակվել է որպես մանր խուլիգանություն, և նա ձերբակալվել է 14 օրով։
Կոնաշենկոյի կինը՝ Ռոքսանա Շատունովսկայան, սկանդալից հետո լքել է New Holland-ի տնօրենի պաշտոնը՝ այս որոշումը բացատրելով ամուսնու «մարդկության հետ անհամատեղելի հրեշավոր հայտարարություններով»։