Ահաբեկչության դեմ պետք է պայքարել միասին, երկրները պետք է նստեն բանակցությունների սեղանի շուրջ եւ դրա համար արդյունավետ լուծում գտնեն։ Այս մասին ՏԱՍՍ-ի հարցազրույցում ասել է ՄԱԿ գլխավոր քարտուղարի Արեւմտյան Աֆրիկայի եւ Սահելի գծով հատուկ ներկայացուցիչ Լեոնարդո Սանթոս Սիմաոն։
Նրա խոսքով՝ ահաբեկչությունը չի սահմանափակվում մի երկրի տարածքով, նրա ազդեցությունն ու հետեւանքները շատ էական են հանրության համար։ «Ինչպե՞ս պետք է մենք կատարենք մեր աշխատանքը սեփական կազմակերպությունում, որպեսզի հաղթահարենք այդ խնդիրը։ Ես կարծում եմ, որ դա իրականանալի է։ Դա հնարավոր է։ Ի՞նչ է հարկավոր՝ մի փոքր հանգստություն։ Եվ [երկրները] պետք է նստեն բանակցությունների սեղանի շուրջ, որպեսզի կողմերը համաձայնեն աշխատել միասին ու գտնեն արդյունավետ լուծումներ»,- նշել է նա։
«Ահաբեկչությունն ուղղակիորեն կամ անուղղակիորեն ազդում է յուրաքանչյուրի վրա։ Որովհետեւ, ասենք թե, մեզ մոտ մի պետություն ենթարկվել է ահաբեկչության ազդեցությանը, բայց այն ունի տնտեսական, սոցիալական կապեր այլ երկրների հետ, որոնց վրա նույնպես ինչ-որ կերպ անդրադառնում է այդ խնդիրը»,- ավելացրել է հատուկ ներկայացուցիչը։