ՀՀ-ում «Միր» քարտերի արգելափակման հարցը մեդալի երկու կողմ ունի: Այս մասին յսօր՝ մարտի 28-ին, ԱԺ-ում լրագրողների հետ հանդիպման ժամանակ հայտարարեց ԱԺ «Քաղաքացիական պայմանագիր» խմբակցության պատգամավոր, ԱԺ տնտեսական հանձնաժողովի փոխնախագահ Բաբկեն Թունյանը՝ պատասխանելով հարցին, թե «Միր» քարտի սպասարկումը դադարեցնելն ինչպես կազդի ՀՀ տնտեսության վրա։
«Եթե մենք «Միր»-ի հետ կապված ու մնացած պատժամիջոցների հետ կապված որևէ քայլ չենք կատարում՝ դա ինչպես կազդի, և կատարելու դեպքում՝ ինչպես կազդի, որովհետև շատ դեպքերում մեր բանկային համակարգը, եթե փորձի շրջանցել պատժամիջոցները, կհայտնվի աշխարհից մեկուսացված վիճակում, ինչը մեր ոչ միայն ֆինանսական ոլորտին, այլև իրական հատվածին կդնի լուրջ խնդիրների առաջ»,- հայտարարեց նա:
Թունյանը նշեց, որ որպես տնտեսական հանձնաժողովի անդամ և որպես էներգետիկայի հանձնաժողովի անդամ՝ «Եվրանեսթում» մասնակցել է երկու նիստի, որին ընդդիմադիր գործընկերները մասնակցել են առաջին 5 րոպեն. «Զեկույցների ժամանակ Հայաստանի նկատմամբ կոնկրետ մեղադրական հայտարարություններ են հնչել նաև սանկցիաները շրջանցելու հնարավորությունների առումով, որին պատասխանել ենք ու հիմնավորել ենք, որ նման բան չկա:
Այս իմաստով դա երկսայր սուր է, պետք է և՛ նայել պատժամիջոցները չշրջանցելու ռիսկերը, և՛ շրջանցելու ռիսկերը: Իմ կարծիքով, ՀՀ-ն այսօր շատ հավասարակշռված և զգուշավոր դիրքորոշում է որդեգրում, և «Միր» քարտերի սպասարկումը, բացի ՎՏԲ բանկից, մնացած բանկերում արգելելու որոշումը լուրջ, հավասարակշռված, ամեն ինչը հաշվի առնող որոշում է եղել»,-ասաց Թունյանը։