ԱՄՆ նախագահ Ջո Բայդենի օգնականները քննարկել են Իրանի հարվածից հետո նրա հեռուստատեսային ելույթի հնարավորությունը, սակայն հրաժարվել են այդ գաղափարից էսկալացիայից խուսափելու համար։ Այս մասին հայտնում է Politico թերթը՝ հղում անելով ամերիկյան վարչակազմի աղբյուրներին։
Ըստ թերթի, «Սպիտակ տան աշխատակիցները կիրակի օրը քննարկել են ԱՄՆ ժողովրդին դիմելու Բայդենի հնարավորությունը» այն բանից հետո, երբ «Իսրայելը ամերիկյան ուժերի հետ միասին խոցեց Իրանից արձակված անօդաչուների և հրթիռների ճնշող մեծամասնությունը»։ Սակայն նման տեսաուղերձ կազմակերպելու կոնկրետ ծրագրեր չեն եղել, ընդգծում է թերթը։ Միևնույն ժամանակ, Բայդենը «միտումնավոր չի հայտնվել հանրության առաջ Իրանի հարվածից հետո»՝ հուսալով, որ դա «կնպաստի իրավիճակի դեէսկալացմանը»։
«Խորհրդականների գնահատմամբ, նախագահի մասնակցությամբ խոշոր իրադարձությունը, օրինակ՝ հեռուստաուղերձը, հավանաբար, կսրեր լարվածությունը և կարող էր հրահրել Թեհրանին», - գրում է թերթը: Ըստ աղբյուրներից մեկի, Սպիտակ տան Օվալաձև սենյակից Բայդենի ուղերձը միայն «կթեժացներ» իրավիճակը։ «Դրանից ավելի լավ է խուսափել»,- նշել է Politico-ի աղբյուրը:
Իրանի հարվածից հետո Սպիտակ տան մամուլի գրասենյակը տարածել է Բայդենի հայտարարությունը, որում ամերիկացի առաջնորդը դատապարտել է հարձակումը՝ ընդգծելով, որ Իսրայելը ամերիկյան ուժերի օգնությամբ կարողացել է խոցել գրեթե բոլոր անօդաչու թռչող սարքերն ու հրթիռները, որոնք Իրանը և նրա կողմնակիցները կիրառել են հրեական պետության վրա գրոհելիս։