ԵՄ դիվանագիտության ղեկավար Ժոզեպ Բորելը և Եվրոպական հարևանության և ընդլայնման քաղաքականության հարցերով հանձնակատար Օլիվեր Վարհելին համատեղ հայտարարություն են տարածել Վրաստանի խորհրդարանի կողմից «Օտարերկրյա ազդեցության թափանցիկության մասին» օրինագծի առաջին ընթերցմամբ ընդունման վերաբերյալ։ Այս մասին հայտնում է Վրաստանի հանրային հեռարձակողի Առաջին ալիքը։
«Այսօր Վրաստանի խորհրդարանն առաջին ընթերցմամբ ընդունեց «Օտարերկրյա ազդեցության թափանցիկության մասին» օրենքը՝ չնայած Եվրամիության բազմիցս կոչերին՝ հրաժարվել այս օրենքից և չնայած զանգվածային բողոքներին։
Սա շատ մտահոգիչ իրադարձություն է, և այս օրենքի վերջնական ընդունումը բացասաբար կանդրադառնա Վրաստանի առաջընթացի վրա դեպի ԵՄ։ Այս օրենքը չի համապատասխանում ԵՄ հիմնական նորմերին և արժեքներին։
Վրաստանն ունի կենսունակ քաղաքացիական հասարակություն, որը նպաստում է ԵՄ-ին անդամակցելու ուղղությամբ երկրի հաջող առաջընթացին: Առաջարկվող օրենքը կսահմանափակի քաղաքացիական հասարակության և լրատվամիջոցների ազատ գործելու հնարավորությունը, կարող է սահմանափակել խոսքի ազատությունը և անարդարացիորեն խարանել այն կազմակերպություններին, որոնք օգուտ են բերում Վրաստանի քաղաքացիներին:
ԵՄ-ն Վրաստանին կոչ է անում ձեռնպահ մնալ այնպիսի օրենքների ընդունումից, որոնք կարող են վտանգել Վրաստանի ուղին դեպի ԵՄ, մի ճանապարհ, որին աջակցում է Վրաստանի քաղաքացիների ճնշող մեծամասնությունը»,- ասվում է հայտարարության մեջ։