Կառավարությունն իր այսօրվա՝ ապրիլի 18-ի նիստում գերակա ոլորտում իրականացվող ներդրումային ծրագրերի շրջանակում մի շարք ընկերությունների ազատեց ներմուծման մաքսատուրքից:

Մասնավորապես, մաքսատուրքից ազատվեց «ԻՆ-ՎԻ» ՍՊԸ-ն, որի կողմից ներմուծվող հումքը նախատեսվում է օգտագործել մալուխների և հաղորդալարերի արտադրության համար։ Արտադրությունն իրականացվելու է ՀՀ Երևան քաղաքում։ Ընկերությունը հիմնադրվել է 2011թվականին։

Արդեն իսկ իրականացվել է 5․6 մլրդ դրամի ներդրում շրջանառու միջոցների ձեռքբերման, ինչպես նաև 368 մլն դրամի ներդրում հիմնական միջոցների ձեռքբերման համար։

Ծրագրի շրջանակներում նախատեսվում է իրականացնել 16 մլրդ դրամի ներդրում հումքի (ներառյալ ներմուծվող հումքի արժեքը) ձեռքբերման և 800 մլն դրամի ներդրում հիմնական միջոցների ձեռքբերման և նոր արտադրամասերի կառուցման համար։

Ներկայումս առկա է 92 աշխատատեղ՝ 375 հազ դրամ միջին ամսական աշխատավարձով։ Ներդրումային ծրագրի շրջանակներում մինչև 2027 թվականը աշխատատեղերի թիվը հասցնել մինչև 105-ի՝ 400 հազ դրամ միջին ամսական աշխատավարձով։

Արտոնություն ստանալու համար ներկայացված ապրանքների արժեքը կազմում է 10․5 մլրդ դրամ: Մաքսատուրքից ազատման արտոնությունը գնահատվում է 525 մլն դրամ:

Մաքսատորիքից ազատվելու արտոնություն ստացավ նաեւ «ԱԱՍ ԻՆԴՈՒՍՏՐՅԱ» ՍՊԸ-ն, որի կողմից ներմուծվող հումքը նախատեսվում է օգտագործել ջերմազգայուն թղթի, ինքնասոսնձվող ջերմազգայուն պիտակի թղթի, ալյումինե տարաների կափարիչների, թղթյա բաժակների և այլ թղթյա պարագաների, յուղաթղթի և թխուկի թղթի արտադրության համար։ Արտադրությունն իրականացվելու է ՀՀ Տավուշի մարզում։ Ընկերությունը հիմնադրվել է 2017 թվականին։

Արդեն իսկ իրականացվել է 250 մլն դրամի ներդրում սարքավորումների և այլ հիմնական միջոցների ձեռքբերման, ինչպես նաև 120 մլն դրամի ներդրում շրջանառու միջոցների ձեռքբերման համար։ Ծրագրի շրջանակներում նախատեսվում է իրականացնել 200 մլն դրամի ներդրում հիմնական միջոցների (սարքավորումներ և նոր շենք-շինություն) ձեռքբերման և 9․55 մլրդ դրամի ներդրում հումքի ձեռքբերման համար։

Ներկայումս առկա է 50 աշխատատեղ՝ 135 հազ դրամ միջին ամսական աշխատավարձով։ Ներդրումային ծրագրի շրջանակներում մինչև 2027 թվականը աշխատատեղերի թիվը հասցնել մինչև 95-ի՝ 195 հազ դրամ միջին ամսական աշխատավարձով։

Արտոնություն ստանալու համար ներկայացված ապրանքների արժեքը կազմում է 9․55 մլրդ դրամ: Մաքսատուրքից ազատման արտոնությունը գնահատվում է 517 մլն դրամ:

Կառավարության մեկ այլ որոշմամբ մաքսատուրքից ազատելու որոշում կայացվեց «ՆԵԿԱ» սահմանափակ պատասխանատվությամբ ընկերության վերաբերյալ:

Այս ընկերության կողմից ներմուծվող հումքը նախատեսվում է օգտագործել կահույքի արտադրության համար։ Արտադրությունն իրականացվելու է ՀՀ Արմավիրի մարզում։ Ընկերությունը հիմնադրվել է 2016թվականին։

Ծրագրի շրջանակներում նախատեսվում է իրականացնել 999․9 մլն դրամի ներդրում հումքի ձեռքբերման և 1 մլրդ դրամի ներդրում հիմնական միջոցների ձեռքբերման համար։

Ներկայումս առկա է 45աշխատատեղ՝ 187 հազ դրամ միջին ամսական աշխատավարձով։ Ներդրումային ծրագրի շրջանակներում մինչև 2027 թվականը աշխատատեղերի թիվը հասցնել մինչև 80-ի՝ 359 հազ դրամ միջին ամսական աշխատավարձով։

Արտոնություն ստանալու համար ներկայացված ապրանքների արժեքը կազմում է 999․9 մլն դրամ: Մաքսատուրքից ազատման արտոնությունը գնահատվում է 52 մլն դրամ: