Ռումինիայի Կրայովա քաղաքում ապրիլի 18-ի գիշերը հզոր պայթյուն է տեղի ունեցել բազմաբնակարան շենքում, ինչի հետևանքով մեկ կին է զոհվել, մի քանի մարդ վիրավորվել է, իսկ հարևանները ստիպված են եղել տեղափոխվել հարազատների ու ընկերների մոտ, տեղեկացնում է Digi24-ը։
Պայթյունը տեղի է ունեցել կեսգիշերին։ Պայթյունի հարվածային ալիքի պատճառով փլուզվել է հարկի առաստաղը, լրջորեն վնասվել են պատերը, կոտրվել են հարևանների ապակիները։ Պայթյունի պատճառը հավանաբար գազի բալոնն է եղել։
Պայթյունի էպիկենտրոնում գտնվող բնակարանում ապրող կինը մահացել է, հարևան բնակարանից երեք մարդ մնացել է փլատակների տակ։ Հարևանները կարողացել են հանել երկուսին, երրորդ տուժածին դուրս են բերել ժամանած փրկարարները։
Հարևանները պատմում են, որ սկզբում մտածել են, որ մեքենա է պայթել, և միայն հետո են հասկացել, որ տան մի մասն ավերվել է։
Շենքի մոտ 50 բնակիչ ստիպված է եղել տեղափոխվել հարազատների ու ընկերների մոտ։