Երևանում ու մարզերում խաղաղ անհնազանդության ակցիաները շարունակվում են։
Քաղաքացիները այս պահին փակել են Երևան-Ապարան մայրուղին։
Բացի այդ, քաղաքացիները փակել են Հայաստան-Վրաստան միջպետական ճանապարհը՝ Բագրատաշենի հատվածում։
Իսկ մի խումբ երիտասարդներ երթ ու իրազեկման ակցիա են իրականացնում Նոր Նորքում՝ Գայի արձանի հարևանությամբ գտնվող տարածքում։
Հիշեցնենք՝ Հանուն հայրենիքի շարժմանը միացած բազմաթիվ քաղաքացիներ մի քանի օր է՝ զանգվածային ակցիաներ են իրականացնում հանրապետության տարբեր վայրերում՝ պահանջելով Նիկոլ Փաշինյանի հրաժարականը։
Այսօր առավոտից Տավուշի թեմի առաջնորդ Բագրատ Սրբազանի կոչով Երեւանում փողոցներ են փակվում: Ժամը 08։00-ից նրանք մայրաքաղաքում շուրջ 20 փողոց են փակել։ Ժամը 11.00-ի դրությամբ 156 մարդ է բերման ենթարկվել ոստիկանների կողմից:
Լրատվամիջոցների հրապարակած կադրերում երևում է` ինչպես են ոստիկաններն ուժ կիրառելով բերման ենթարկում բազմաթիվ քաղաքացիների, որոշ դեպքերում նաև գետնին տապալելով։ Այդ գործողություների ընթացքում վնասել են օպերատորներից մեկի տեսախցիկը, իսկ 24news.am-ի լրագրողը քաշքշոցի ժամանակ կորցրել է գիտակցությունը:
Սրբազանը նախօրեին կայացած հանրահավաքում կոչ արեց առավոտյան ժամը 8-ից անել «տոտալ դասադուլներ, գործադուլներ, պարալիզացնել ամբողջ քաղաքը եւ ՀՀ զանազան տարածքներ՝ անհամաձայնություն հայտնելով ստին եւ չարիքին»։