Ռուսական հարձակողական գործողությունների տեմպերը Խարկովի մարզի հյուսիսում վերջին օրերին դանդաղել են, հերթական ամփոփագրում գրել է Պատերազմի ուսումնասիրման ամերիկյան ինստիտուտը (ISW)։
Ռուսական զորքերի հարձակողական ակտիվության բնույթը համապատասխանում է այն գնահատականին, որի համաձայն՝ ռուսական առաջնահերթությունը բուֆերային գոտու ստեղծումն է սահմանի մոտ, այլ ոչ թե ավելի խոր թափանցումը Խարկովի մարզում։
Ուկրաինայի ՊՆ Հետախուզության գլխավոր վարչության պետ Կիրիլ Բուդանովը երեքշաբթի հայտնել է, որ իրավիճակը Խարկովի մարզում սկսել է կայունանալ լրացուցիչ ուկրաինական ստորաբաժանումների եւ նրանց պաշտպանական գործողությունների ծավալման արդյունքում։
Երկու կողմերի աղբյուրները նաեւ տեղեկացրել են, որ ռուսական զորքերը կիրառում են նոր մարտավարություն՝ օգտագործում են ոչ մեծ գրոհային խմբեր (հինգ մարդուց ոչ ավելի)՝ ուկրաինական դիրքեր թափանցելու համար, ինչից հետո միավորվում են այլ ոչ մեծ խմբերի հետ՝ ավելի մեծ հարվածային խմբեր ստեղծելով։
Սակայն ոչ մեծ գրոհային խմբերի օգտագործումը կարող է հանգեցնել մեծ կորուստների եւ հարձակման ընդհանուր տեմպերի դանդաղման, գրել է ISW-ն։
Ուկրաինայի ԶՈւ Գլխավոր շտաբի պետ Անատոլի Բարգիլեւիչը նշել է, որ միայն վերջին օրերին ռուսական զորքերն այս ուղղությամբ կորցրել են 1 740 զինվոր։ ISW-ն գրել է, որ չի կարող հաստատել այս թիվը, բայց կորուստների ենթադրվող ցուցանիշը կարող է համապատասխանել հարձակողական գործողությունների տեմպերի նվազմանը, որը նկատվել է մայիսի 14-ին։
Եթե հարձակման տեմպերը համեմատաբար ցածր մնան, ռուսական ուժերը, հավանաբար, կկենտրոնանան նոր դիրքերի ամրացման եւ բուֆերային գոտու ստեղծման վրա սահմանամերձ շրջանում, այլ ոչ թե կխորանան մարզում, եզրակացրել են փորձագետները։