Համայնքապետարանից էլ, մարզպետարանից էլ եկել են Օհանավան, կարկուտի պատճառած վնասի չափը տեսել, բայց փոխհատուցման մասին ոչինչ չեն ասել: Այս մասին այսօր՝ մայիսի 15-ին, NEWS.am-ին հայտնեց Օհանավանի վարչական ղեկավար Էդգար Հայրապետյանը՝ խոսելով մայիսի 7-ին տեղացած կարկուտի հետևանքների մասին:
Օհանավանի բնակիչ Արգիշտի Գասպարյանի խոսքով էլ, ո՛չ համայքապետարանի, ո՛չ էլ մարզպետարանի ներկայացուցիչներն իր այգի չեն գնացել և վնասի չափը չեն արձանագրել, թեև կարկուտի պատճառով ամենաշատն իր այգին էր տուժել:
«Ո՞ւմ դիմենք, բոլորն էլ արդեն գիտեն վնասի մասին: Ժովորդի համար սովորական է դարձել. էնքան ա եղել, որ նման դեպք ա եղել ու ոչ մի տեղից փոխհատուցում չեն տվել»,-ասաց Արգիշտի Գասպարյանը՝ նշելով, որ թեև գյուղացիները հուսահատված են, սակայն, դժվար թե, որևէ բան նախաձեռնեն և որևէ մեկին դիմեն:
Ավելի վաղ հայտնել էինք, որ մայիսի 7-ին տեղացած կարկուտի պատճառով վնասվել էր Օհանավան գյուղի խնձորի այգիների բերքը: Գյուղացիները հույս ունեին, որ պետությունը ինչ-որ չափով կփոխհատուցի վնասը: