Ոստիկանները և սևբերետավորները Օպերայի մոտից ծեծելով ու քարշ տալով բերման ենթարկեցին քաղաքացուն: Մեկ տասնյակ ոստիկաններ ու սևբերետավորներ բռնի ուժով նրան նստեցրեցին մեքենա և բերման ենթարկեցին:
«Այդ տղան ուղղակի ճանապարհն էր փորձում անցնել»,-ասաց ականատեսներից մեկը:
«Մարդը շատ նորմալ խնդրեց, ասաց ճանապարհը բացեք անցնեմ, չթողեցին: Հետո սկսեցին զրուցել, քիչ հետո էլ իրար հայհոյել: Սևբերետավորները հարձակվեցին, սկսեցին 5-6 հոգով ծեծել, սեռական բնույթի հայհոյանքներ հասցնել»,-պատմեց մեկ այլ ականատես՝ նշելով, որ բերման ենթարկված քաղաքացին ուղղակի ցանկանում էր անցնել փողոցը, որը ոստիկանները փակ են պահում:
Հիշեցնենք, որ այսօր Ազատության հրապարակում նախատեսված Բագրատ Սրբազանի գլխավորած շարժման բողոքի ակցիային ընդառաջ ոստիկանական մեծաթիվ ուժեր են բերվել Երեւանի կենտրոն: Ոստիկանական բազմաթիվ մեքենաներ են կայանված այս պահին Օպերայի շենքին հարակից հատվածներում:
Մետաղյա արգելապատնեշներով փակվել են Օպերայի շենքը շրջապատող փողոցների մայթերը: Արգելապատնեշներով շրջափակված է նաեւ Ազատության հրապարակը, որտեղ սպասվող միջոցառման շրջանակներում տաղավարներ եւ սեղաններ են տեղադրված: Քաղաքացիները ստիպված են շրջանցել արգելապատնեշները:
