Պատգամավորի աշխատանքի արդյունավետությունը չի կարելի չափել նիստերի դահլիճում գտնվելու ժամերով, NEWS.am-ի թղթակցին ասել է Ազգային ժողովի պատգամավոր, ՀՀԿ ներկայացուցիչ Արտակ Զաքարյանը` պատասխանելով բյուջեի նախագծի քննարկման ժամանակ ԱԺ դահլիճի դատարկության մասին հարցին: Երկուշաբթիից մինչեւ ուրբաթ 2012թ. պետբյուջեի նախագծի լսումներին ներկա են գտնվել 131 պատգամավորներից 15-ը:
«Չեմ կարծում, որ ձեւական կողմին պետք է այդքան ուշադրություն դարձնել: Պատգամավորների աշխատանքը բյուջեի հարցում միայն դահլիճում ֆիզիկական ներկայությունն ապահովելը չէ: Այն ենթադրում է Կառավարության ներկայացուցիչների հետ հանդիպումներ, տարբեր առաջարկների ներկայացում եւ քննարկում: Նշեմ, որ ես ինքս էլ 1-2 անգամ բացակայել եմ բյուջեի քննարկումներին հենց այն պատճառով, որ դահլիճից դուրս աշխատում էի», - վստահեցրել է Զաքարյանը:
Միեւնույն ժամանակ, ՀՅԴ պատգամավոր Արտյուշա Շահբազյանը կարծում է, որ դատարկ պատգամավորական աթոռները պայմանավորված են նրանով, որ բյուջեի ընդունումը առանց էական փոփոխությունների միանգամայն կանխորոշված է եւ ոչ ոքի մեջ կասկած չի հարուցում: «Արդյունքում, քննարկումները ցուցադրական բնույթ են կրում», - ասել է Շահբազյանը: