Հայկական ատոմակայանը գտնվում է պատշաճ մակարդակում: Այսօր` դեկտեմբերի 6-ին, լրագրողների հետ հանդիպման ժամանակ նման հայտարարություն արեց ՀՀ նախագահին կից ատոմային էներգետիկայի անվտանգության խորհրդի նախագահ, գերմանացի պրոֆեսոր Ադոլֆ Բիրկհոֆերը:
Անդրադառնալով Հայաստանի հարեւան երկրների, այդ թվում` Թուրքիայի, Ադրբեջանի ու Վրաստանի մտահոգություններին, ապա Ա. Բիրկհոֆերն ասաց, որ այդպիսի հայտարարություններ միշտ էլ արվում են նաեւ գերմանական ատոմակայանների վերաբերյալ, որոնք սակայն իրականությանը չեն համապատասխանում: «Ես բազմաթիվ տարիներ աշխատել եմ ատոմակայանների անվտանգության տարբեր մարմիններում, բայց Հայաստանը միակ երկիրն է, որտեղ երկրի նախագահը մասնակցում է անվտանգության քննարկումներին, լավ իրազեկված է ատոմակայանի անվտանգությունից»,- ասաց գերմանացի մասնագետը:
Ա. Բիրկհոֆերի կարծիքով` եթե ատոմակայանում աշխատում են բարձրակարգ ինժեներներ, լավ հիմքի վրա է կառավարումն ու վերահսկումը, ապա այդ ատոմակայանն անվտանգ է եւ հուսալի: Հայաստանի ատոմակայանը, նրա խոսքով, բավարարում է այդ պահանջներին:
Ա. Բիրկհոֆերը ՀՀ նախագահին կից ատոմային էներգետիկայի անվտանգության խորհրդի նախագահ է ընտրվել 1996 թ.: Նա նաեւ ատոմային էներգետիկայի հարցերով զբաղվող մի շարք միջազգային կառույցների անդամ է (Միջազգային ատոմային անվտանգություն, Կորեական թերակղզու էներգետիկայի զարգացման կազմակերպություն, «Գերմանական ատոմֆորում» եւ այլն):
