Հայաստանի գյուղատնտեսության նախարար Սերգո Կարապետյանն ու Լիբանանի արդյունաբերության նախարար Վրեժ Սապունջյանը Երեւանում կայացած հանդիպման ժամանակ քննարկել են Հայաստանից Լիբանան գյուղատնտեսական ապրանքների արտահանման հարցը: Վրեժ Սապունջյանը Երեւանում է Լիբանանի նախագահ Միշել Սուլեյմանի` ՀՀ կատարած պաշտոնական պատվիրակության կազմում:
Գյուղնախարարության մամուլի ծառայությունից NEWS.am-ին հայտնում են, որ զրուցակիցները կարծիք են հայտնել, որ անհրաժեշտ է ակտիվացնել հատկապես երկկողմ տնտեսական համագործակցությունը, քանի որ առկա է մեծ ներուժ այն զարգացնելու համար: Սապունջյանը հետաքրքրվել է, թե Հայաստանում ինչպիսի ագրոարդյունաբերական ապրանքներ են թողարկվում եւ ցանկություն հայտնել ստանալ ավելի մանրամասն տեղեկություններ` Հայաստանից Լիբանան այդ ապրանքների արտահանում կազմակերպելու նպատակով:
ՀՀ գյուղատնտեսության նախարարն իր հերթին հավելել է, որ ոչ միայն փոխադարձ արտահանումներն, այլ նաեւ համատեղ ձեռնակությունների ստեղծումն ու երկկողմ ներդրումները կարող են լինել համագործակցության լավագույն օրինակ: Հյուրի խնդրանքով նախարար Կարապետյանը հակիրճ ներկայացրել է ՀՀ գյուղատնտեսության վիճակը եւ համոզմունք հայտնել, որ այս տարվա տնտեսական ցուցանիշներում կգրանցվի երկնիշ տվյալներ:
Վրեժ Սապունջյանը տեղեկացրել է, որ Լիբանանի գյուղատնտեսության նախարարությունը պատրաստակամություն է հայտնել առաջիկայում ՀՀ գյուղատնտեսության նախարարության հետ ստորագրել երկկողմ համագործակցության գործնական ծրագիր, որն ընդունվել է նախարար Սերգո Կարապետյանի կողմից: