Հարավային Օսիայի խորհրդարանն արգելափակել է նախագահի նախկին թեկնածու Ալլա Ջիոեւայի եւ նախկին նախագահ Էդուարդ Կոկոյտիի միջեւ կնքված համաձայնագիրը: Այն մերժել է Հանրապետության գլխավոր դատախազ Թայմուրազ Հուգաեւի եւ Գերագույն դատարանի նախագահ Ացամազ Բիչենովի հրաժարականի դիմումները:
Քվեարկությանը մասնակցել են 34 պատգամավորներից 31-ը: Հրաժարականների հաստատման համար բավական կլիներ ձայների պարզ մեծամասնությունը: Սակայն գլխավոր դատախազի հրաժարականը հաստատել է միայն 15 պատգամավոր (նույնքան պատգամավոր էլ դեմ է եղել, մեկ քվեաթերթիկ էլ անվավեր է ճանաչվել), Գերագույն դատարանի նախագահի հրաժարականին կողմ է եղել 8 պատգամավոր:
Թայմուրազ Հուգաեւի եւ Ածամազ Բիչենովի հրաժարականը Կոկոյտիի եւ նախագահի նախկին թեկնածու, ընդդիմադիր Ալլա Ջիոեւայի միջեւ կնքված փոխզիջման համաձայնագրի պայմաններից մեկն էր:
Համաձայնագրում նշվել էին ինչպես Կոկոյտիի, այնպես էլ խորհրդարանի պարտավորությունները, որոնք պետք է հաստատեին տվյալ անձանց հրաժարականը:
Սակայն պայմանագիրը կապել են Կոկոյտին եւ Ջիոեւան (ռուսական կողմի միջնորդությամբ), պատգամավորները դրա տակ չեն ստորագրել:
Հարավային Օսիայի նախագահի նախկին թեկնածու Ալլա Ջիոեւան հարավօսիական պատգամավորների` գլխավոր դատախազի եւ Գերագույն դատարանի նախագահի հրաժարականները մերժելու քայլի պատասխանատվությունը դրել է Ռուսաստանի վրա: Այս մասին տեղեկացնում է «Ինտերֆաքս»-ը: