Դոնի Ռոստովում հայազգի երիտասարդ Արամ Հայկյանին ծեծի ենթարկման դեպքը սովորական խուլիգանություն չէ: Այս մասին NEWS.am-ի թղթակցի հետ զրույցում ասաց «Ժառանգություն» տեղեկատվական կենտրոնի կառավարման նախագահ Արմեն Մկրտչյանը` ներկայացնելով միջադեպի մանրամասները:
«Ես անձամբ խոսել եմ Արամի 18-ամյա ռուս ընկերոջ հետ, ով այդ պահին նրա հետ է եղել, եւ ահա թե ինչ է նա պատմել: Դեկտեմբերի 3-ին նրանք միասին վերադարձել են տուն: Այդ օրը մառախլապատ է եղել: Ինչ-որ պահի մառախուղի միջից նրանց առջեւ հայտնվել են մի քանի երիտասարդներ, որոնցից մեկի ձեռքին Արամի ընկերը բեյսբոլի ձող է նկատել, զգուշացել են, սակայն որոշել են առաջ գնալ: Երբ հավասարվել են, նրանք վայրկենական հանել են մետաղե ձեղերը, իսկ մեկի ձեռքին էլ դանակ է հայտնվել: Երիտասարդների վրա հարձակվել են առանց ավելորդ խոսքերի»,-պատմեց Մկրտչյանը:
Հետո Արամի ընկերը փախչել է` Արամին եւս զգուշացնելով, որ փախչի: Նրա հետեւեից պահանջել են կանգնել, բայց նա հեռացել է քիչ թե շատ ավելի մարդաշատ վայր, որտեղ, ըստ նրա, տեսախցիկ է տեղադրված: Որոշ ժամանակ անց նրան դադարել են հետապնդել, որից հետո ընկերը հավաքել է Արամի հեռախոսահամարը: Արամը չի պատասխանել, եւ նա ետ է վերադարձել` փնտրելու ընկերոջը:Արամին նա գտել է արնաշաղախ: «Տղան փրկել է Արամի կյաքը: Եթե նա փոքր-ինչ ուշանար, Արամին այլեւս հնարավոր չէր լինի փրկել»,-նշեց Մկրտչյանը:Հարձակվողները եղել են 5-6 հոգի, նրանք բոլոր եղել են գլխարկներով եւ հատուկ կոշիկով, որոնց հետքերը մնացել են Արամի մարմնի վրա: Արամի ընկերը նկատել է, որ հարձակվողներից մի քանիսի դեմքը ծածկված է եղել ֆուտբոլային «Ռոսստելմաշ» ակումբի տարբերանիշն ունեցող շարֆերով:«Այստեղ ոմանք ասում են դա խուլիգանություն է, ոմանք էլ` թե կողոպուտի նպատակով է եղել: Սակայն Արամի ձեռքին եղել է ոսկե շղթա, նրա մոտ եղել է 3-4 հազ. ռուբլի կանխիկ գումար, թանկարժեք հեռախոս, եւ դրանց ոչ ոք ձեռք չի տվել»:Մկրտչյանը դժվարացավ ասել, թե իրականում ովքեր են եղել հարձակվողները. «Հայտնի է միայն, որ ռուսներ են եղել:
Ականատեսները պատմում են, թե տեսել են մի քանի երիտասարդների, որոնք եղել են մոտակայքում եւ ազգայնական կարգախոսներ են բղավել: Ընդհանուր առմամաբ Արամի ընկերոջ եւ նրանց նկարագրությունները համընկնում են»:
Ինչպես տեղեկացրել էր NEWS.am –ը, միջադեպը տեղի էր ունեցել դեկտեմբերի 3-ի երեկոյան: Հիվանդանոց տեղափոխված Արամը ենթրակվել էր երկու վիրահատության եւ գիտակցության էր եկել միայն դեկտեմբերի 16-ին:Իրավապահները կողմից կատարվում է հետաքննություն: