Վրաստանի խորհրդարանն այսօր` դեկտեմբերի 20-ին, պաշտպանել է նախագահ Միխայիլ Սահակաշվիլիի նախաձեռնությունը եւ քվեարկել եւս մեկ հետեւակային գումարտակ Աֆղանստան ուղարկելու օգտին, որն առաքելությունը կիրականացնի Անվտանգության աջակցության միջազգային ուժերի (ISAF) կազմում, հաղորդում է «Նովոստի Գրուզիան»:
Գումարտակն առաքելությունը կիրականացնի ԱՄՆ հրամանատարության ներքո:
Աֆղանստանում Անվտանգության աջակցության միջազգային ուժերի կազմում 2009թ. օգոստոսից ծառայություն է իրականացնում 175 հոգանոց վրացական մեկ վաշտ, որը տեղակայված է Քաբուլում, Ֆրանսիայի պատասխանատվության գոտում, եւ Գիլմենդ նահանգում գտնվող 749 հոգանոց գումարտակ` ԱՄՆ պատասխանատվության ներքո:
Առաքելության սկզբից Աֆղանստանում զոհվել է տասը վրացի զինվորական:
