Հայաստանի կառավարությունը կավելացնի Սյունիքի մարզում ուրանի որոնմամբ զբաղվող «Հայ-ռուսական լեռնահանքային կազմակերպության» կանոնադրական կապիտալը: Հարցը ներառված է կառավարության դեկտեմբերի 29-ի նիստի օրակարգում:
Ընկերության կապիտալը կավելացվի լրացուցիչ բաժնետոմսեր թողարկելու եւ ՀՀ-ի օգտին տեղաբաշխելու միջոցով: Լրացուցիչ թողարկվող բաժնետոմսերի արժեքը կկազմի 590 մլն դրամ, եւ կվճարվի Հայաստանի Հանրապետությանը սեփականության իրավունքով պատկանող երկրաբանական տեղեկատվությամբ:
Նշենք, որ Հայ-ռուսական լեռնահանքային կազմակերպությանը 2009 թ. Սյունիքի մարզում ուրանի որոնման աշխատանքների լիցենզիա է տրամադրվել 5 տարով:
Հայ-ռուսական լեռնահանքային կազմակերպության կանոնադրական կապիտալը 50/50 սկզբունքով պատկանում է ՀՀ էներգետիկայի եւ բնական պաշարների նախարարությանն ու Ռուսաստանի Դաշնության «Ատոմռեդմետզոլոտո» ընկերությանը: Ներկա դրությամբ «Հայ-ռուսական լեռնահանքային կազմակերպության» կանոնադրական կապիտալը 92 մլն դրամ է: