Լեհաստանի անօրինական միգրանտները կարող են իրենց կարգավիճակը օրինականացնելու դիմումներ ներկայացնել: Անցած տարի ամռանը լեհական խորհրդարանի ընդունած համապատասխան օրենքը ուժի մեջ է մտել 2012թ. հունվարի 1-ից, հաղորդում է «ՈՒՆԻԱՆ»-ը:
Կարգավիճակը կարող են օրինականացնել օտար պետությունների այն քաղաքացիները, որոնք երկրի Շենգենյան գոտի մտնելու պահից` 2007թ. դեկտեմբերի 20-ից ի վեր, անընդհատ Լեհաստանի տարածքում են բնակվել:
Համաներումից կարող են օգտվել նաեւ այն օտարերկրացիները, որոնք 2010թ. հունվարի 1-ից անընդհատ գտնվել են Լեհաստանում, եւ որոնց ավելի վաղ մերժել էին փախստականի կարգավիճակ տրամադրել:
Լեհաստանում օրինական բնակության իրավունք չեն ստանա Շենգենյան SIS բազայում գրանցված օտարերկրացիները` դիմումի մեջ նշված ոչ հավաստի տեղեկատվության համար, ինչպես նաեւ եթե օտարերկրացու բնակվելը Լեհաստանի տարածքում կարող է սպառնալ երկրի անվտանգությանը կամ շահերին:
Փորձագետների տվյալներով` 2003 եւ 2007թթ. նախորդ համաներումների խիստ պայմանների պատճառով դրանցից օգտվեցին չորս հազարից էլ քիչ ներգաղթյալներ, այն դեպքում, երբ նրանց ընդհանուր թիվը Լեհաստանում ենթադրաբար կազմում է 50-500 հազար:
Լեհաստանի ՆԳՆ-ն ապօրինի ներգաղթյալների թիվը գնահատում է 50 հազար` նշելով, որ նրանց մեծամասնությունը ոչ թե ուկրաինացիներ են, այլ ուրիշ երկրների քաղաքացիներ, որոնց համար ավելի բարդ է լեհական վիզա ստանալ, այդ թվում, առաջին հերթին, հայեր եւ վիետնամցիներ:
Նախորդ տարվա սկզբին 38 միլիոն բնակչություն ունեցող Լեհաստանում օրինական բնակության իրավունք ուներ գրեթե 100 հազար օտարերկրացի, որոնց մեկ երրորդ մասը Ուկրաինայի քաղաքացիներ են:
