Վանաձորում, այսօր` հունվարի 13-ին, ժամը 15-ին, 23-ամյա Արման Ջիլավյանը դանակահարել է 20-ամյա Արամ Շահվերդյանին: Այս մասին NEWS.am-ին հայտնում են ոստիկանության լրատվության վարչությունից: Վերջինս մարմնական ծանր վնասվածքներով տեղափոխվել է հիվանդանոց եւ քիչ առաջ վիրահատվել:
Ինչպես մեզ հաջողվեց պարզել, դեպքը տեղի է ունեցել կենցաղային մակարդակի վիճաբանությունից հետո, որին հաջորդել է ծեծկռտուքը: Այնուհետեւ Արմանն իր դանակով ծանր հարվածներ է հասցրել Արամին:
Մենք տեղեկացանք, որ նրանք նույն բակի բնակիչներ են, Արամն էլ վերջերս է զորացրվել:
Ոստիկանությունից NEWS.am-ին հայտնեցին, որ դեպքը արագ բացահայտվել է եւ ոստիկանության Լոռիի մարզային վարչության Վանաձորի բաժնի Բազումի բաժանմունքի աշխատակիցները ձեռնարկած օպերատիվ հետախուզական միջոցառումներով նշյալ հանցագործությունը կատարելու կասկածանքով բերման են ենթարկել Արման Ջիլավյանին:
Փաստի առթիվ հարուցվել է քրեական գործ: