Ադրբեջանը խոչընդոտում է շփման գծում միջադեպերի հետաքննության մասին պայմանավորվածության իրագործմանը: Այս մասին, այսօր` հունվարի 16-ին, մամլո ասուլիսում հայտարարել է Հայաստանի արտգործնախարար Էդվարդ Նալբանդյանը:
Հիշեցնելով, որ համապատասխան պայմանավորվածությունը ձեռք էր բերվել նախորդ տարվա մարտին Սոչիում կայացած նախագահական հանդիպման ժամանակ, նախարարն ընդգծել է, որ այն միջազգային կառույցների հավանությանն է արժանացել: Սակայն Ադրբեջանը խոչընդոտում է դրա կատարմանը եւ հետաքննման մեխանիզմների ստեղծմանը, մերժում է դրա հետ կապված միջնորդների բոլոր առաջարկությունները: Ավելին, ադրբեջանական կողմը ԵԱՀԿ բյուջեի եւ համապատասխան մեխանիզմների ֆինանսավորումը դրանում ներառելու դրույթի քննարկման ընթացքում դեմ է արտահայտվել` սպառնալով ամբողջ բյուջեի վրա վետո դնելու իր իրավունքն օգտագործել:
Այդկերպ, Ադրբեջանը կրկին հրաժարվել է ձեռքբերված պայմանավորվածությունների կատարումից: Այնուամենայնիվ, Հայաստանի արտգործնախարարը հույս է հայտնել, որ այդ ուղղությամբ բանակցությունները կշարունակվեն, եւ հետաքննման մեխանիզմների մշակման մասին պայմանավորվածությունը կիրագործվի: Ինչպես նշել է նախարարը, միջադեպերի հետաքննումը թույլ կտա ոչ միայն բացահայտել մեղավորներին, այլեւ կնպաստի նոր միջադեպերի կանխարգելմանը: