Հայաստանի ԱԺ նախագահ Սամվել Նիկոյանն այսօր` հունվարի 18-ին, խորհրդակցության էր հրավիրել միջազգային կառույցներում ԱԺ պատվիրակությունների ղեկավարներին: Խորհրդակցությանը ներկա են եղել նաեւ ԼՂՀ ԱԺ նախագահ Աշոտ Ղուլյանը, ՀՀ նախագահի աշխատակազմի ղեկավար Վիգեն Սարգսյանը, ԱԺ փոխնախագահ Էդուարդ Շարմազանովը, ԱԳ փոխնախարար Շավարշ Քոչարյանը:
ԱԺ մամուլի ծառայությունից NEWS.am-ին հայտնում են, որ Սամվել Նիկոյանը նշել է, որ խորհրդարանական դիվանագիտությունը մեր պետության արտաքին քաղաքականության բաղկացուցիչ ու կարեւոր մասն է, եւ խորհրդակցության նպատակն է քննարկել միջազգային կառույցներում ՀՀ ԱԺ պատվիրակությունների կատարած աշխատանքը, առկա խնդիրները եւ ծրագրերը, տեղեկատվություն փոխանակել, ծանոթանալ առաջարկների ու տեսակետների, դրանց հիման վրա ավելի արդյունավետ ու համակարգված կազմակերպել խորհրդարանականների աշխատանքը: Իսկ խորհրդակցությանը ԼՂՀ ԱԺ նախագահի մասնակցությունը, Սամվել Նիկոյանի խոսքով, եւս մեկ վկայություն է, որ ԼՂ ժողովուրդը` հանձինս իր օրինական ընտրված իշխանությունների, մասնակցում է բոլոր այն խնդիրների քննարկմանը եւ լուծմանը, որոնք վերաբերում են իր ճակատագրին:
Սամվել Նիկոյանը նշել է, որ պետք է ակտիվորեն օգտագործել խորհրդարանական համագործակցության յուրաքանչյուր ձեւաչափ, անկախ նրանից, այնտեղ Հայաստանին առնչվող հարց քննարկվո՞ւմ է, թե` ոչ: Նա կարեւոր է համարել փոխայցելություններն ու միջազգային համաժողովների անցկացումը Հայաստանում, որոնց միջոցով արտերկրի մեր գործընկերները հնարավորություն են ստանում անմիջական, տեղեկատվություն ստանալ:
ՍԾՏՀ-ում հայկական խորհրդարանական պատվիրակության ղեկավար Գագիկ Մինասյանը բարձր է գնահատել նման ձեւաչափով խորհրդակցության անցկացումը, որտեղ պատվիրակությունների ղեկավարները հնարավորություն ունեն նախանշել հետագա գործունեության ծրագրերն ու այն խնդիրները, որոնք ընդհանուր են եւ որոնց ուղղությամբ պետք է համատեղ աշխատանք կատարել: Նա նշել է, որ նման հանդիպումների շարունակականությունը օգտակար կլինի եւ խորհրդարանի, եւ ընդհանրապես պետության համար:
Եզրափակելով խորհրդակցությունը` Ազգային ժողովի նախագահ Սամվել Նիկոյանը նշեց, որ կարեւորը ոչ թե քննարկման գործընթացն է, այլ այն աշխատանքը, որ պետք է կատարվի դրա արդյունքների հիման վրա: Խորհրդարանի ղեկավարը պատրաստակամություն է հայտնել հետագայում եւս շարունակել նման հանդիպումները: