Թերթը գրում է, որ ՕԵԿ-ն անցել է ընդհատակ: «Կուսակցությունը շատ լուրջ խնդրի առջեւ է կանգնած: ՕԵԿ-ականները ներսում մտորում են բոլոր տարբերակները՝ գոնե անցողիկ 5 տոկոսն ապահովելու համար: Մեր տեղեկություններով՝ Հանրապետականներն ՕԵԿ-ի հարցով բաժանվել են երկու թեւի: Նրանց գերակշիռ հատվածն անհանգստացած է փոքր եղբոր ցածր վարկանիշով եւ ընտրություններում ՕԵԿ-ի համար «տեղեր նկարելը «ժողովրդի մեջ ավելորդ հուզումներ ստեղծելու պատճառ է համարում: Հանրապետականների այս խումբը համոզված է, որ նոր խորհրդարանում իրենց համար ՕԵԿ-ին փոխարինող պետք է գտնի: Բայց կան Հանրապետականներ էլ, որ համոզված են՝ փորձած թանն անփորձ մածունից լավ է, եւ իր առաքելությունն ավելի լավ իրականացնող ուժ, քան ՕԵԿ-ն է, քաղաքական դաշտում այլեւս չկա: Հանրապետականում շշուկներ կան, որ նախագահը ՕԵԿ-ի կողմն է, բայց ընտրություններում 7 մանդատից ավելի չի տա»,- գրում է «Երկիր»-ը:
